ಮೋಹಪಾಶಗಳೆಳೆಯೆ ಮಮತೆಯಂಕುಶವಿರಿಯೆ (134)

ಮೋಹಪಾಶಗಳೆಳೆಯೆ ಮಮತೆಯಂಕುಶವಿರಿಯೆ |
ಆಹುತಂ ತಾನಹಂ ಭವಶಿಖೆಗೆ ಮೂಢಂ ||
ಸೋಽಹಮಭಿಮತದ ಸರ್ವಾತ್ಮತ್ವದಿಂ ಜಗಕೆ |
ಸಾಹ್ಯವೀವಂ ಜ್ಞಾನಿ - ಮರುಳ ಮುನಿಯ || (೧೩೪)

(ಮೋಹಪಾಶಗಳ್+ಎಳೆಯೆ)(ಮಮತೆ+ಅಂಕುಶ+ಇರಿಯೆ)(ತಾನ್+ಅಹಂ)(ಸೋಽಹಂ+ಅಭಿಮತದ)(ಸಾಹ್ಯ+ಈವಂ)

ಮೋಹವೆಂಬ ಬಂಧನಗಳು ಮನುಷ್ಯನನ್ನು ಎಳೆಯಲು ಮಮತೆಯೆಂಬ ಅಂಕುಶವು ಅವನನ್ನು ತಿವಿಯಲು, ಸಂಸಾರ (ಭವ)ವೆಂಬ ಬೆಂಕಿ(ಶಿಖ)ಗೆ ಮೂರ್ಖನು ತಾನಾಗಿ ತಾನು ಬಲಿ(ಆಹುತಂ)ಯಾಗುತ್ತಾನೆ. ತಾನೇ ಪರಮಾತ್ಮ(ಸೋಽಹಂ)ನೆಂಬ ಅಭಿಪ್ರಾಯ (ಅಭಿಮತ)ದಿಂದ ಕೂಡಿದ ಮತ್ತು ಪ್ರಪಂಚದ ಎಲ್ಲ ಆತ್ಮಗಳೂ ಒಂದೇ ಎಂಬ ಭಾವನೆಯಿಂದ ಬುದ್ಧಿವಂತನು ಪ್ರಪಂಚಕ್ಕೆ ಸಹಾಯ(ಸಾಹ್ಯ)ಕನಾಗುತ್ತಾನೆ.