ಗೃಹಿಧರ್ಮವನು ನಿನ್ನ ಮಹಿಯ ಚೌರ್ಯಕೆ ಹೊದಿಸಿ (771)

ಗೃಹಿಧರ್ಮವನು ನಿನ್ನ ಮಹಿಯ ಚೌರ್ಯಕೆ ಹೊದಿಸಿ |
ಸಹಜ ಲೋಭಿತೆಯ ನಿಃಸ್ಪೃಹತೆಯೆನ್ನುವುದೆ? ||
ವಹಿಪುದು ಕುಟುಂಬ ಭಾರವನಾತ್ಮದೆಲುಬುಗಳು |
ಸಹಿಸಲಹ ಮಿತಿಯೊಳಗೆ - ಮರುಳ ಮುನಿಯ || (೭೭೧)

(ಭಾರವನ್+ಆತ್ಮದ+ಎಲುಬುಗಳು)(ಸಹಿಸಲು+ಅಹ)

ನಿನ್ನ ದಿನನಿತ್ಯದ ಗೃಹಕೃತ್ಯದ ಧರ್ಮಪಾಲನೆಗಳನ್ನು ಈ ಜಗತ್ತಿನಲ್ಲಿ(ಮಹಿ) ನೀನು ಮಾಡುವ ಕಳ್ಳತನ(ಚೌರ್ಯಕ್ಕೆ)ಕ್ಕೆ ಹೊದಿಸಿ, ಸಹಜವಾಗಿರುವ ನಿನ್ನ ಜಿಪುಣತನವನ್ನು ನೀನು ಪ್ರಾಮಾಣಿಕ ಮತ್ತು ನಿಃಸ್ವಾರ್ಥ (ನಿಃಸ್ಪೃಹತೆ) ಬುದ್ಧಿ ಎಂದೆನ್ನುವೆಯೇನು? ಸಂಸಾರದ ಭಾರಗಳನ್ನು ನಿನ್ನ ಆತ್ಮದ ಮೂಳೆಗಳು (ಎಲುಬುಗಳು) ಸಹಿಸಲು ಸಾಧ್ಯವಾದಷ್ಟು ಮಿತಿಯೊಳಗೆ ಹೊತ್ತುಕೊಳ್ಳುತ್ತವೆ.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Grab not the land of others under the garb of householder’s duty
Label not your inborn greed as selflessness,
Bear your family burden only as much as
The bones of your self can endure – Marula Muniya (771)
(Translation from "Thus Sang Marula Muniya" by Sri. Narasimha Bhat)