ಒಂದಿರುವುದೆಂದೆಂದುಮೊಂದು ತಾನೇ ತಾನು (21)

ಒಂದಿರುವುದೆಂದೆಂದುಮೊಂದು ತಾನೇ ತಾನು |
ಹಿಂದೆನಿಪುದಿಲ್ಲ ಮುಂದೆನಿಪುದಿಲ್ಲೆತ್ತಲ್ ||
ಸಂದಿನಲಿ ಬಯಲಿನಲಿ ಬೀಡಿನಲಿ ಕಾಡಿನಲಿ |
ವಂದಿಸೊ ಅದೊಂದಕ್ಕೆ-ಮರುಳ ಮುನಿಯ || (೨೧)

 (ಒಂದಿರುವುದು+ಎಂದೆಂದುಂ+ಒಂದು) (ಹಿಂದೆ+ಎನಿಪುದು+ಇಲ್ಲ) (ಮುಂದೆ+ಎನಿಪುದು+ಇಲ್ಲ+ಎತ್ತಲ್)

 ಎಂದೆಂದಿಗೂ ತಾನೇ ತಾನಾಗಿ ಇರುವಂತಹ ವಸ್ತು ಒಂದೇ ಒಂದು ಇದೆ. ಅದು ಪರಬ್ರಹ್ಮ ವಸ್ತು. ಅದಕ್ಕೆ ಹಿಂದೆ ಎನ್ನಿಸುವುದು ಯಾವುದೂ ಇಲ್ಲ. ಮುಂದೆ ಎನ್ನಿಸುವುದೂ ಎಲ್ಲಿಯೂ ಕಾಣಸಿಗುವುದಿಲ್ಲ. ಸಂದುಗೊಂದುಗಳಲ್ಲಿ, ವಿಸ್ತಾರವಾಗಿರುವ ಬಯಲಿನಲ್ಲಿ, ಎಲ್ಲರೂ ವಾಸಿಸುವ ಮನೆ(ಬೀಡು)ಗಳಲ್ಲಿ, ಕಡೆಗೆ ಕಾಡುಮೇಡುಗಳಲ್ಲಿ ಹಾಗೆಯೇ ನೀನು ಎಲ್ಲಿದ್ದರೆ ಅಲ್ಲೇ ಆ ವಸ್ತುವಿಗೆ ನಮಸ್ಕರಿಸು.