ಜಗಕೆಲ್ಲ ಕಾರಣಂ ಪ್ರೇರಣಂ ಧಾರಣಂ (27)

ಜಗಕೆಲ್ಲ ಕಾರಣಂ ಪ್ರೇರಣಂ ಧಾರಣಂ |
ಭಗವಂತನೆಂಬೊಂದದೇನೊ ಇಹುದಲ್ತೆ ||
ಬಗೆವ ನಾಮದರ ಸಂಬಂಧಗಳ ಗೂಢಮದು |
ಮುಗಿವ ಕೈಗಳನದಕೆ - ಮರುಳ ಮುನಿಯ || (೨೭)

(ಭಗವಂತನ್+ಎಂಬ+ಒಂದು+ಅದು+ಏನೊ) (ಇಹುದು+ಅಲ್ತೆ) (ನಾಂ+ಅದರ) (ಗೂಢಂ+ಅದು)(ಕೈಗಳನ್+ಅದಕೆ)


 ಈ ಪ್ರಪಂಚವು ಹುಟ್ಟಿ, ಇರುವುದಕ್ಕೆ ಕಾರಣಕರ್ತ, ಇದನ್ನು ನಿರ್ಮಿಸಿ, ನಿಭಾಯಿಸುವುದಕ್ಕೆ ಪ್ರಚೋದಕನು ಮತ್ತು ಇದನ್ನು ನಡೆಯಿಸುವುದಕ್ಕೆ ಆಧಾರವಾಗಿರುವ (ಧಾರಣಂ) ಭಗವಂತನೆಂಬ ಯಾವುದೋ ಒಂದು ವಸ್ತು ಇದೆ ತಾನೆ ! ನಾವು ಅದರ ಈ ಸಂಬಂಧಗಳ ಬಗ್ಗೆ ಯೋಚಿಸಿ(ಬಗೆವ)ದರೆ ಅದು ರಹಸ್ಯ(ಗೂಢ)ವಾಗಿರುವುದು ಕಂಡುಬರುತ್ತದೆ. ನಾವು ಆ ರಹಸ್ಯಕ್ಕೆ ಕೈ ಮುಗಿಯೋಣ.