ಖೇಲನ ವ್ಯಾಪಾರವೀ ಜಗದ್ವಿಸ್ತಾರ |
ಮೂಲಕಾರಣನಿದಕೆ ಪೂರ್ಣಸ್ವತಂತ್ರಂ ||
ಲೀಲೆಗೆಂದೀ ಚಿತ್ರಮೋಹವೈರಾದಿಗಳ |
ಚಾಲವಂ ರಚಿಸಿಹಂ - ಮರುಳ ಮುನಿಯ || (೯೭)
(ಜಗತ್+ವಿಸ್ತಾರ)(ಮೂಲಕಾರಣನ್+ಇದಕೆ)(ಲೀಲೆಗೆ+ಎಂದು+ಈ)
ಈ ಜಗತ್ತಿನ ವೈಶಾಲ್ಯ, ಆ ಪರಮಾತ್ಮನ ಆಟ(ಖೇಲನ)ಮಾಡುವ ವ್ಯವಹಾರ. ಇದಕ್ಕೆ ಹುಟ್ಟು ಮತ್ತು ಕಾರಣಗಳಾಗಿರುವ ಅವನು ಸಂಪೂರ್ಣವಾಗಿ ತನ್ನಿಚ್ಛೆ ಬಂದಂತೆ ನಡೆಯಬಲ್ಲನು. ತನ್ನ ಆಟಪಾಟಗಳಿಗೋಸ್ಕರ ಅವನು ಈ ಚಿತ್ರ, ಅಜ್ಞಾನ, ಅಕ್ಕರೆ, ಪ್ರೀತಿ, ದ್ವೇಷ ಮತ್ತು ಹಗೆತನಗಳ ಆಕರ್ಷಣೆಯ ಬಲೆ(ಜಾಲ)ಗಳನ್ನು ನಿರ್ಮಿಸಿದ್ದಾರೆ.
No comments:
Post a Comment