ಜಗಬೇಕು ಬ್ರಹ್ಮಕ್ಕೆ ಬೇಡದಿರೆ ಸೃಜಿಸುವುದೆ ? |
ಬಗೆಬಗೆಯ ಜೀವಲೀಲೆಗಳದರ ಸರಸ ||
ಜಗವ ತೊರೆಯೆಂಬವರೆ ನೀಂ ಬೆದಕುತಿಹುದೇನು ? |
ಸಿಗದೆ ಕಣ್ಗದು ಜಗದಿ ? - ಮರುಳ ಮುನಿಯ || (೧೫೬)
(ಬೇಡದೆ+ಇರೆ)(ಜೀವಲೀಲೆಗಳು+ಅದರ)(ಬೆದಕುತಿಹುದು+ಏನು)(ಕಣ್ಗೆ+ಅದು)
ಬ್ರಹ್ಮನಿಗೆ ಜಗತ್ತು ಬೇಕು. ಅದಕ್ಕೋಸ್ಕರವೇ ಅವನು ಈ ಜಗತ್ತನ್ನು ಸೃಷ್ಟಿಸಿ(ಸೃಜಿಸು)ದ್ದಾನೆ. ವಿಧವಿಧವಾದ ಜೀವಿಗಳ ಆಟಗಳು ಬ್ರಹ್ಮನ ವಿನೋದವಾದ ಚೆಲ್ಲಾಟ. ಈ ಜಗತ್ತಿನಲ್ಲಿ ಬಾಳಿ ಉಪಯೋಗವಿಲ್ಲ, ಇದನ್ನು ಬಿಟ್ಟು ಹೋಗುವುದೇ ಒಳಿತು ಎನ್ನುವ ನೀವೆಲ್ಲ ಏನನ್ನು ತಾನೇ ಹುಡುಕುತ್ತಿದ್ದೀರಿ? ಅದು ಜಗತ್ತಿನಲ್ಲಿ ನಿಮ್ಮ ಕಣ್ಣುಗಳಿಗೆ ಸಿಗುವುದಿಲ್ಲವೇ?
No comments:
Post a Comment