ದಶಮುಖನ ಕಾಮಾಂಧ್ಯ ಕುರುಪತಿಯ ಲೋಭಾಂದ್ಯ (38)

ದಶಮುಖನ ಕಾಮಾಂಧ್ಯ ಕುರುಪತಿಯ ಲೋಭಾಂದ್ಯ |
ಕುಶಿಕಜನ ತಪದುರುಬು ಮೋಹದುರುಬುಗಳು ||
ರುಷೆಯೊ ರುಜಿವನೊ ರಿಕ್ತತೆಯೊ ರಾಗಚೇಷ್ಟೆಗಳೊ |
ರಸದೂಟ ಶಿವನಿಗದು - ಮರುಳ ಮುನಿಯ || (೩೮)

(ಕಾಮ+ಆಂಧ್ಯ)(ಲೋಭ+ಆಂದ್ಯ)(ತಪದ+ಉರುಬು)(ಮೋಹದ+ಉರುಬುಗಳು)(ರಸದ+ಊಟ)

ಸೀತೆಯ ಮೇಲಿನ ಕಾಮದಿಂದ ಕುರುಡನಾದ ರಾವಣ(ದಶಮುಖ), ಸಕಲ ಸಾಮ್ರಾಜ್ಯಕ್ಕೂ ತಾನು ಮಾತ್ರ ಅಧಿಪತಿಯಾಗಬೇಕೆಂಬ ದುರ್ಯೋಧನ (ಕುರುಪತಿ)ನ ಅತ್ಯಾಸೆಯಿಂದ ಆದ ಕುರುಡುತನ, ಬ್ರಹ್ಮರ್ಷಿ ಪದವಿ ಪಡೆಯಲು ವಿಶ್ವಾಮಿತ್ರ(ಕುಶಿಕಜ) ಋಷಿ ಮಾಡಿದ ತಪಸ್ಸಿನ ತೀವ್ರತೆ ಮತ್ತು ಮೈಮರೆಯುವಂತಹ ಪರಾಕ್ರಮಗಳು. ಇವುಗಳಿಂದ ಆಗುವ ರೋಷಗಳೋ (ರುಷೆಯೊ), ಬೇನೆಗಳೋ (ರುಜಿನವೊ), ಬಡತನವೋ (ರಿಕ್ತಿತೆಯೊ) ಅಥವಾ ಪ್ರೀತಿ ಮತ್ತು ಸಂತೋಷ(ರಾಗ)ಗಳಿಂದ ಕೂಡಿದ ಸರಸಗಳೋ, ಇವುಗಳು ಪರಮಾತ್ಮನಿಗೆ ಮಾತ್ರ ಮೃಷ್ಟಾನ್ನ ಭೋಜನ ಸವಿದಂತೆನ್ನಿಸುತ್ತದೆ.