ನಾನಾ ಸುಮ ಸ್ತೋಮದೊಳಡಂಗಿ ಮಲ್ಲಿಗೆಯು |
ಕಾಣಬಾರದೆ ಕಣ್ಗೆ ಸೂಕ್ಷ್ಮ ನೋಡುವನಾ-|
ಘ್ರಾಣನಕ್ಕಪ್ಪಂತೆ ಲೀನನುಂ ವಿಶದನುಂ |
ನೀನಿರಿಳೆಬಾಳಿನೊಳು - ಮರುಳ ಮುನಿಯ || (೬೮)
(ಸ್ತೋಮದೊಳು+ಅಡಂಗಿ)(ನೋಡುವನ+ಆಘ್ರಾಣನಕ್ಕೆ+ಅಪ್ಪಂತೆ)(ನೀನ್+ಇರು+ಇಳೆ+ಬಾಳಿನೊಳು)
ವಿಧ ವಿಧವಾದ ಹೂವು(ಸುಮ)ಗಳ ರಾಶಿ(ಸ್ತೋಮ)ಯೊಳಗೆ, ನೋಡುವವನ ಸಾಮಾನ್ಯ ದೃಷ್ಟಿಗೆ ಕಾಣಿಸದೆ ಮರೆಯಾಗಿರುವ ಮಲ್ಲಿಗೆಯ ಹೂವು, ಚುರುಕು ದೃಷ್ಟಿಯಿರುವವನ ವಾಸನೆಗೆ (ಅಘ್ರಾಣ) ನಿಲುಕುವಂತೆ, ಈ ಪ್ರಪಂಚದಲ್ಲಿ ಕೆಲವು ವಸ್ತುಗಳು ಬೆರೆತಿರುವಂತಿದ್ದರೂ ಸ್ಪಷ್ಟ(ವಿಶದ)ವಾಗಿರುತ್ತದೆ. ನಿನ್ನ ಜೀವನವು ಸುಖಮಯವಾಗಿರಬೇಕೆಂದರೆ ನೀನೂ ಸಹ ಇದೇ ರೀತಿ ಈ ಭೂಮಿ(ಇಳೆ)ಯಲ್ಲಿ ಜೀವನವನ್ನು ನಡೆಸು. ಹೂವಿನ ರಾಶಿಯಲ್ಲಿಯ ಮಲ್ಲಿಗೆಯ ಹೂವಾಗಿ ಸುಗಂಧವನ್ನು ಹರಡು. ಆದರೆ ಅದು ರಾಶಿಯಲ್ಲಿ ಮರೆಯಾಗಿ ಕಣ್ಣಿಗೆ ಗೋಚರಿಸದಿರುವಂತೆ ನೀನೂ ನಿನ್ನ ಇರುವಿಕೆಯನ್ನು ಇತರರ ಕಣ್ಣಿಗೆ ಬೀಳಿಸದೆ ಸುಗಂಧವನ್ನು ಮಾತ್ರ ಹರಡು.
