ಎವೆಯಿಡದೆ ನೋಡು, ಮರ ಮರವು ಕರೆವುದು ನಿನ್ನ |
ಕಿವಿಯನಾನಿಸು, ಕಲ್ಲು ಕಲ್ಲೊಳಂ ಸೊಲ್ಲು ||
ಅವಧರಿಸು ಜೀವ ಜೀವವುಮುಲಿವುದೊಂದುಲಿಯ |
ಭುವನವೇ ಶಿವವಾರ್ತೆ - ಮರುಳ ಮುನಿಯ || (೮೯)
(ಕಿವಿಯನ್+ಆನಿಸು)(ಜೀವವು+ಉಲಿವುದು+ಒಂದು+ಉಲಿಯ)
ಕಣ್ಣುಗಳ ರೆಪ್ಪೆಗಳನ್ನು (ಎವೆ) ಮಿಟುಕಿಸದೆ ನೋಡು, ಪ್ರಪಂಚದಲ್ಲಿರುವ ಮರ ಮರಗಳೂ ನಿನ್ನನ್ನು ಕರೆಯುತ್ತಿವೆ. ಕಿವಿಗೊಟ್ಟು ಕೇಳು, ಪ್ರಪಂಚದಲ್ಲಿರುವ ಕಲ್ಲು ಕಲ್ಲುಗಳಲ್ಲೂ ಧ್ವನಿ(ಸೊಲ್ಲು)ಗಳನ್ನು ಕೇಳುತ್ತೀಯೆ. ಮನಸ್ಸಿಟ್ಟು ಕೇಳು (ಅವಧರಿಸು) ಪ್ರತಿಯೊಂದು ಜೀವಿಯೂ ಒಂದೊಂದು ಮಾತು(ಉಲಿ)ಗಳನ್ನು ಹೇಳುತ್ತಿದೆ. ಈ ಪ್ರಪಂಚವೆಲ್ಲವೂ ಪರಮಾತ್ಮನ ಸಮಾಚಾರವೇ ಹೌದು.
