ವೈಣಿಕಂ ಶೇಷಣ್ಣ ತಾನೆಳೆದ ನಾದದಲಿ (160)

ವೈಣಿಕಂ ಶೇಷಣ್ಣ ತಾನೆಳೆದ ನಾದದಲಿ |
ಲೀನನಾಗುತೆ ತಾನೆ ಮೈಯ ಮರೆತಂತೆ ||
ತಾನೆ ಗೈದೀಜಗದ ನಗುವಳುಗಳೊಳು ತಾನೆ |
ಆನಂದಿಪನು ಬೊಮ್ಮ - ಮರುಳ ಮುನಿಯ || (೧೬೦)

(ತಾನ್+ಎಳೆದ)(ಲೀನನ್+ಆಗುತೆ)(ಗೈದ+ಈ+ಜಗದ)(ನಗು+ಅಳುಗಳೊಳು)

ಪ್ರಸಿದ್ಧ ವೈಣಿಕರಾದ ಶೇಷಣ್ಣನವರು ತಾವೇ ತಂತಿ ಮೀಟಿ ಮೂಡಿಸಿದ ವೀಣೆಯ ನಾದದಲ್ಲಿ ಪೂರ್ತಿಯಾಗಿ ಬೆರೆತು ತಮ್ಮನ್ನು ತಾವೇ ಮರೆತಂತೆ, ತಾನೇ ನಿರ್ಮಿಸಿದ (ಗೈದ) ಈ ಪ್ರಪಂಚದ ದುಃಖ ಮತ್ತು ಸಂತೊಷಗಳಲ್ಲಿ ಆ ಪರಬ್ರಹ್ಮನು ಆನಂದದಿಂದಿರುತ್ತಾನೆ.