ಲೀಲೆಯದು ಬರಿಲೀಲೆ ಬರಿಬನದ ಬರಿಯಾಟ |
ಸೋಲಿಲ್ಲ ಗೆಲವಿಲ್ಲ ಚಿಂತೆಯೇನಿಲ್ಲ ||
ಮೂಲಕರ್ತನ ನೈಜ ವೈಭವದ ವಿಸ್ತಾರ |
ಜಾಲಶಕ್ತಿವಿಲಾಸ - ಮರುಳ ಮುನಿಯ || (೧೦೦)
(ಲೀಲೆ+ಅದು)(ಬರಿ+ಆಟ)(ಸೋಲ್+ಇಲ್ಲ)(ಗೆಲವು+ಇಲ್ಲ)(ಚಿಂತೆ+ಏನ್+ಇಲ್ಲ)
ಇವುಗಳೆಲ್ಲವೂ ಕೇವಲ ವಿನೋದ, ಚೆಲ್ಲಾಟ ಮತ್ತು ಆಟ. ಕೇವಲ ವನದಲ್ಲಿ ಆಡುವ ಆಟಗಳಿವು. ಇದರಲ್ಲಿ ಸೋಲು ಮತ್ತು ಗೆಲವುಗಳಿಲ್ಲ. ಯಾವ ವಿಧವಾದ ಕಳವಳಕ್ಕೂ ಇಲ್ಲಿ ಅವಕಾಶವಿಲ್ಲ. ಇವುಗಳಿಗೆ ಹುಟ್ಟು ಮತ್ತು ಕಾರಣಕರ್ತನಾಗಿರುವನ ಸಹಜವಾದ ವೈಭವದ ಹರಡುವಿಕೆಗಳಿವು. ಅವನು ಹಬ್ಬಿಸಿರುವ ಜಾಲದಲ್ಲಿ ಅವನ ಶಕ್ತಿ ತೋರುವ ವಿಲಾಸಗಳಿವು.
