ಭೃತ್ಯನೆಂತರಿಗುಂ ಸ್ವಕರ್ತವ್ಯಮಂ ಸ್ವಾಮಿ (374)

ಭೃತ್ಯನೆಂತರಿಗುಂ ಸ್ವಕರ್ತವ್ಯಮಂ ಸ್ವಾಮಿ |
ಚಿತ್ತವನು ತಾಂ ಕಾಣದಂದೆನ್ನಬೇಡ ||
ಪ್ರತ್ಯಹದಿ ನಿನಗೆ ಬಹ ಲೋಕ ಸಂಪರ್ಕದಿನೆ |
ಕೃತ್ಯಸೂಚನೆ ನಿನಗೆ - ಮರುಳ ಮುನಿಯ || (೩೭೯)

(ಭೃತ್ಯನು+ಎಂತರಿಗುಂ)(ಕಾಣದು+ಅಂದು+ಎನ್ನಬೇಡ)

ಸೇವಕನಾದವನು ತಾನು ಮಾಡಬೇಕಾದ ಕೆಲಸವನ್ನು ಎಷ್ಟು ಮಾತ್ರ ಅರ್ಥ ಮಾಡಿಕೊಂಡರೂ ಸಹ ಅವನು ತನ್ನ ಒಡೆಯನ ಮನಸ್ಸನ್ನು ತಿಳಿದುಕೊಳ್ಳಲಾರ ಎಂದು ಹೇಳಬೇಡ. ನಿನಗೆ ಲೋಕದ ಜೊತೆ ಬರುವ ಪ್ರತಿದಿನ(ಪ್ರತ್ಯಹ)ದ ಸಂಬಂಧಗಳಿಂದ, ನೀನು ಮಾಡಬೇಕಾಗಿರುವ ಕೆಲಸದ (ಕೃತ್ಯ) ಸೂಚನೆಗಳು ಸಿಗುತ್ತವೆ.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Do you think that a servant cannot know his duties
And he cannot read his master’s mind
You are taught your duties through public contact
That you obtain in your daily life – Marula Muniya
(Translation from "Thus Sang Marula Muniya" by Sri. Narasimha Bhat)

ಅರುಣಿಮೆಯ ಸಂಜೆಗಳ ನೀಲಿಮೆಯ ನಭತಲವ (374)

ಅರುಣಿಮೆಯ ಸಂಜೆಗಳ ನೀಲಿಮೆಯ ನಭತಲವ |
ಹರಿತವನಶಾದ್ವಲವ ತಾಮ್ರಪಲ್ಲವವ ||
ಪರಿಪರಿಯ ಬಣ್ಣ ಸೊಬಗುಗಳ ಕಣ್ಣಿಗೆ ಕಲಿಪ |
ಗುರುವಾರು ಪ್ರಕೃತಿಯಲೆ - ಮರುಳ ಮುನಿಯ || (೩೭೪)

(ಗುರು+ಆರು)(ಪ್ರಕೃತಿ+ಅಲೆ)

ಸೂರ್ಯನು ಸಾಯಂಕಾಲದ ಹೊತ್ತು ಮುಳುಗುವಾಗ ಕಾಣುವ ನಸುಗೆಂಪು(ಅರುಣಿಮೆ) ಬಣ್ಣವನ್ನು, ನೀಲಿಯಾಗಿ ಕಾಣುವ ಆಕಾಶ(ನಭ)ದ ಸ್ಥಳವನ್ನು, ಹಸಿರು (ಹರಿತ) ಬಣ್ಣವಾಗಿ ಕಾಣುತ್ತಿರುವ ಕಾಡಿನ ಹುಲ್ಲುಗಾವಲುಗಳನ್ನು (ಶಾದ್ವಲ), ಕೆಂಪು(ತಾಮ್ರ)ಬಣ್ಣದಿಂದ ಒಡಗೂಡಿರುವ ಗಿಡಗಳ ಚಿಗುರು(ಪಲ್ಲವ)ಗಳನ್ನು ಮತ್ತು ಈ ರೀತಿ ವಿಧವಿಧವಾದ ವರ್ಣಗಳನ್ನು ಮತ್ತು ಅಂದಗಳನ್ನು ನಿನ್ನ ಕಣ್ಣುಗಳಿಗೆ ಕಾಣಿಸಿಕೊಡುವ ಗುರು ಯಾರು? ಪ್ರಕೃತಿ ತಾನೆ?
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Nature is the great preceptor who teaches your eyes to enjoy
The beauty of the red rosy evenings and the blue sky
The grace of green wild vegetation and the copper red springs
And the wide variety of colors – Marula Muniya (374)
(Translation from "Thus Sang Marula Muniya" by Sri. Narasimha Bhat)