ಮೂಲಚೇತನದ ಮೂಟೆಗಳೆಲ್ಲ ವಸ್ತುಗಳು (53)

ಮೂಲಚೇತನದ ಮೂಟೆಗಳೆಲ್ಲ ವಸ್ತುಗಳು |
ಸ್ಥೂಲದಿಂ ಸೂಕ್ಷ್ಮಗಳು ಸೂಕ್ಷ್ಮದಿಂ ಸ್ಥೂಲ ||
ಕಾಲ ದೇಶಾಸಂಗ ಪರಿವರ್ತ್ಯ ಜಡಜೀವ |
ಮಾಲಾಪ್ರವಾಹವದು -ಮರುಳ ಮುನಿಯ || (೫೩)

ಮೂಲಶಕ್ತಿಯ ಮೂಟೆಗಳೆಲ್ಲವೂ ನಮಗೆ ಈ ಪ್ರಪಂಚದಲ್ಲಿರುವ ವಸ್ತುಗಳಾಗಿ ಕಂಡುಬರುತ್ತದೆ. ಇವು ದಪ್ಪ(ಸ್ಥೂಲ)ದರಿಂದ ಸಣ್ಣ (ಸೂಕ್ಷ್ಮ) ಮತ್ತು ಸಣ್ಣದರಿಂದ ದಪ್ಪ ಆಗಬಲ್ಲವು. ಒಂದು ಸಣ್ಣ ಬೀಜದಿಂದ ಒಂದು ಬೃಹತ್ ಮರ ಮತ್ತು ಆ ಮರದಿಂದ ಪುನಃ ಒಂದು ಸಣ್ಣ ಬೀಜ ಹುಟ್ಟುತ್ತದೆ. ಜಡವಾಗಿರುವ ಜೀವವು ಕಾಲ, ಸ್ಥಳ ಮತ್ತು ಸಂಪರ್ಕದಿಂದ ಪರಿವರ್ತನೆಗೊಳ್ಳುತ್ತದೆ. ಬೀಜ ಮರವಾಗುವ ಉದಾಹರಣೆಯನ್ನು ತೆಗೆದುಕೊಂಡರೆ, ಅ ಬೀಜವನ್ನು ಒಂದು ಸ್ಥಳದಲ್ಲಿ ನೆಡಬೇಕು. ಅದಕ್ಕೆ ನೀರು, ಗೊಬ್ಬರ, ಸೂರ್ಯನ ಬೆಳಕು ಇತ್ಯಾದಿಗಳು ಸೇರಬೇಕು. ಹಾಗಾದಾಗ ಸ್ವಲ್ಪ ಸಮಯದ ನಂತರ ಅದು ಗಿಡವಾಗಿ ಬೆಳೆಯಬಹುದು. ಈ ರೀತಿಯಾಗಿ ಅದು ಪರಿವರ್ತನೆಗೊಳ್ಳುತ್ತದೆ. ಸಾಲು ಸಾಲಾಗಿ ಬರುವ ಪ್ರವಾಹ (ಮಾಲಾಪ್ರವಾಹ)ಗಳಿಂದ ಪ್ರಕೃತಿಯಲ್ಲಿ ಪರಿವರ್ತನೆಗಳಾಗುತ್ತವೆ. ಇದಕ್ಕೆ ಮೂಲಚೇತನ ಪರಮಾತ್ಮನೆಂಬುದನ್ನು ಮರೆಯಬಾರದು.