ಇರುವುದೊಂದೋ ಎರಡೊ ಎರಡಂತೆ ಎಸೆವೊಂದೊ |
ಮರಳು ಗಂಧಗಳೆರಡೊ, ಗಂಧವಿರದರಲು ಕಸ ||
ಮೆರಗು ಮಣಿ ಬೇರೆಯೇಂ ಮೆರುಗಿರದ ಮಣಿಯೆ ಶಿಲೆ |
ಎರಡುಮಿರೆ ಪುರುಳೊಂದು - ಮರುಳ ಮುನಿಯ || (೬೧)
(ಇರುವುದು+ಒಂದೋ)(ಎಸೆವ+ಒಂದೊ)(ಗಂಧಗಳು+ಎರಡೊ)(ಗಂಧ+ಇರದ+ಅರಲು)
(ಮೆರಗು+ಇರದ)(ಎರಡುಂ+ಇರೆ)(ಪೊರುಳ್+ಒಂದು)
ಮೊದಲೇ ಹೇಳಿದಂತೆ ಇರುವುದು ಒಂದೋ ಅಥವಾ ಎರಡೋ. ಇಲ್ಲ, ಒಂದೇ ಒಂದು ವಸ್ತು ಎರಡರಂತೆ ಶೋಭಿಸುತ್ತಿದೆಯೋ(ಎಸೆವ)? ಹೂವು (ಮರಲು) ಮತ್ತು ಸುಗಂಧಗಳು ಎರಡೋ? ಸುಗಂಧವಿರದಿದ್ದಲ್ಲಿ ಹೂವು (ಅರಲು) ಕಸಕ್ಕೆ ಸಮಾನವಾಗುತ್ತದೆ. ಕುಸುಮದೊಳು ಗಂಧವೋ, ಗಂಧದೊಳು ಕುಸುಮವೋ... ಕನಕದಾಸರ ಪದ ಜ್ಞಾಪಕಕ್ಕೆ ಬರುತ್ತದೆ. ಹೊಳಪು (ಮೆರಗು) ಮತ್ತು ರತ್ನ ಬೇರೆ ಬೇರೆಯೋ? ಹೊಳಪಿರದ ಮಣಿ ಕೇವಲ ಕಲ್ಲೆಂದೆನ್ನಿಸಿಕೊಳ್ಳುತ್ತದೆ ಅಷ್ಟೆ. ಹೀಗೆ ಎರಡೂ ಇದ್ದರೆ ಮಾತ್ರ ಅದರಲ್ಲಿ ತಿರುಳು (ಪುರುಳ್) ಇರುತ್ತದೆ.
No comments:
Post a Comment