ತರುಣಿಯಾ ಕೊರಳ ಮಣಿಯೆರಡು ಕಾಣ್ಬುದು ಕಣ್ಗೆ (71)

ತರುಣಿಯಾ ಕೊರಳ ಮಣಿಯೆರಡು ಕಾಣ್ಬುದು ಕಣ್ಗೆ |

ಸೆರಗು ಮುಚ್ಚಿರುವ ಸರ ದೊರೆವುದೂಹನೆಗೆ ||

ಪರವಸ್ತು ಮಹಿಮೆಯಂತರೆ ತೋರುವುದು ಕಣ್ಗೆ |

ಪರಿಪೂರ್ಣವದು ಮನಕೆ - ಮರುಳ ಮುನಿಯ || (೭೧)

(ಮಣಿ+ಎರಡು)(ದೊರೆವುದು+ಊಹನೆಗೆ)(ಮಹಿಮೆ+ಅಂತು+ಅರೆ)(ಪರಿಪೂರ್ಣ+ಅದು)

ಒಬ್ಬ ಯುವತಿಯು ತನ್ನ ಕೊರಳಿನಲ್ಲಿ ಹಾಕಿಕೊಂಡಿರುವ ಸರದ ಎರಡು ಮಣಿಗಳು ಮಾತ್ರ ನಮ್ಮ ಕಣ್ಣಿಗೆ ಕಾಣಿಸುತ್ತದೆ. ಏಕೆಂದರೆ ಸರದ ಮಿಕ್ಕಿದ್ದ ಭಾಗವನ್ನು ಆಕೆಯ ಸೆರಗು ಮುಚ್ಚಿಕೊಂಡು, ಅವು ನಮ್ಮ ಕಣ್ಣಿಗೆ ಕಾಣಿಸದಂತೆ ಮಾಡುತ್ತದೆ. ಆದರೆ ಆ ಸರವು ಹೇಗಿರಬಹುದೆಂಬುದು ನಮ್ಮ ಊಹಾಶಕ್ತಿಗೆ ದೊರಕುತ್ತದೆ. ಪರಮಾತ್ಮನ ಮಹಿಮೆಯೂ ಸಹ ಇದೇ ರೀತಿ ಈ ಪ್ರಪಂಚದ ವಸ್ತುಗಳ ಮಧ್ಯದಲ್ಲಿ ಸ್ವಲ್ಪಭಾಗ ಮಾತ್ರ ನಮ್ಮ ಕಣ್ಣುಗಳಿಗೆ ಗೋಚರಿಸುತ್ತವೆ. ಆದರೆ ನಮ್ಮ ಮನಸ್ಸಿಗಾದರೂ ಅವು ಸಂಪೂರ್ಣವಾಗಿ ದೊರಕುಬಲ್ಲುದಾಗಿವೆ.