ರಾತ್ರಿ ದಿವಸ ಕ್ರಮಾವೃತ್ತಿಗಾರ್ ಕಾರಣನೊ (200)

ರಾತ್ರಿ ದಿವಸ ಕ್ರಮಾವೃತ್ತಿಗಾರ್ ಕಾರಣನೊ |
ಭೌತ ಪ್ರಪಂಚ ನಿಯಮಕದಾರೊ ಅವನೇ ||
ವಾತಾವರಣ ವೈಪರೀತ್ಯಕಂ ಕಾರಣನು |
ಕೇತು ರಾಹುವುಮವನೆ - ಮರುಳ ಮುನಿಯ || (೨೦೦)

(ಕ್ರಮ+ಆವೃತ್ತಿಗೆ+ಆರ್)(ನಿಯಮಕೆ+ಅದು+ಆರೊ)(ರಾಹುವುಂ+ಅವನೆ)

ರಾತ್ರಿ ಮತ್ತು ಹಗಲುಗಳು ಒಂದಾದ ಮೇಲೊಂದು ಬರುವ ಸರದಿಗಳಿಗೆ ಮತ್ತು ಈ ಭೌತಪ್ರಪಂಚದ ನಿಯಮಗಳಿಗೂ ಯಾವನು ಕಾರಣಕರ್ತನೋ, ಅವನೇ, ಹವಾಮಾನ ಮತ್ತು ಪರಿಸರಗಳ (ವಾತಾವರಣ) ವಿಪರೀತಗಳಿಗೂ ಸಹ ಕಾರಣನಾದವನು. ರಾಹು ಮತ್ತು ಕೇತುಗಳೂ ಅವನೇ.