ಅಸಮತೆಗಮೆಡೆಯುಂಟು ಸೃಷ್ಟಿನಿರ್ವಾಹದಲಿ (580)

ಅಸಮತೆಗಮೆಡೆಯುಂಟು ಸೃಷ್ಟಿನಿರ್ವಾಹದಲಿ |
ವಸುಧೆಯೊಳಗುಂಟೇನು ಚಾಪೆ ಚಪ್ಪಟೆಯು ||
ಕುಸುಮ ಫಲ ಪರ್ಣಂಗಳೊಂದರಂತೊಂದಿಹುವೆ? |
ಪಶು-ಪಕ್ಷಿಗಳದೇನು? - ಮರುಳ ಮುನಿಯ || (೫೮೦)

(ವಸುಧೆ+ಒಳಗೆ+ಉಂಟೇನು)(ಪರ್ಣಂಗಳ್+ಒಂದರಂತೆ+ಒಂದು+ಇಹುವೆ)(ಪಕ್ಷಿಗಳು+ಅದು+ಏನು)

ಪ್ರಪಂಚದ ವ್ಯವಸ್ಥೆಯಲ್ಲಿ ಸಮಾನವಾಗಿಲ್ಲದಿರುವುದಕ್ಕೆ (ಅಸಮತೆ) ಜಾಗ(ಎಡೆ)ವಿದೆ. ಭೂಮಿಯು ಚಾಪೆ, ಚಪ್ಪಟೆಗಳಂತೆ ಮಟ್ಟಸವಾಗಿದೆಯೇನು? ಹೂವು (ಕುಸುಮ) ಹಣ್ಣು(ಫಲ), ಮತ್ತು ಎಲೆ(ಪರ್ಣ)ಗಳು ಒಂದರಂತೆ ಇನ್ನೊಂದು ಇವೆಯೇನು? ಅಂತೆಯೇ ಪಶು, ಪಕ್ಷಿಗಳು?
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

 Scope there is for inequality in the world arrangement
Is the whole world quite flat like a mat?
Is each flower, fruit or leaf similar to the other?
What about birds and animals? – Marula Muniya (580)
(Translation from "Thus Sang Marula Muniya" by Sri. Narasimha Bhat)

ಅಸಮತೆಗಮೆಡೆಯುಂಟು ಸೃಷ್ಟಿನಿರ್ವಾಹದಲಿ (579)

ಅಸಮತೆಗಮೆಡೆಯುಂಟು ಸೃಷ್ಟಿನಿರ್ವಾಹದಲಿ |
ವಸುಧೆಯಲಿ ನೋಡು ಗಿರಿಝರಿಯರಣ್ಯಂ ||
ಕುಸುಮ ಫಲ ಪರ್ಣಂಗಳೊಂದರಂತೊಂದಿಹುವೆ? |
ಬಿಸಿ ಚಳಿಯ ಋತುಗಳೇಂ? - ಮರುಳ ಮುನಿಯ || (೫೭೯)

(ಅಸಮತೆಗಂ+ಎಡೆಯುಂಟು)(ಝರಿ+ಅರಣ್ಯಂ)(ಪರ್ಣಂಗಳು+ಒಂದರಂತೆ+ಒಂದು+ಇಹುವೆ)

ಸೃಷ್ಟಿಯು ತನ್ನ ಕೆಲಸವನ್ನು ನಿಭಾಯಿಸುವ ಕ್ರಮದಲ್ಲಿ ಅಸಮಾನತೆಗೆ ಅವಕಾಶ(ಎಡೆ)ವನ್ನು ಕೊಟ್ಟಿದೆ. ಭೂಮಿಯಲ್ಲಿ ಬೆಟ್ಟ(ಗಿರಿ), ಅದರಲ್ಲಿ ಹರಿಯುವ ನದಿ(ಝರಿ), ಕಾಡು (ಅರಣ್ಯ), ಹೂವು(ಕುಸುಮ), ಹಣ್ಣು (ಫಲ) ಮತ್ತು ಎಲೆ(ಪರ್ಣ)ಗಳು ಒಂದರಂತೆ ಮತ್ತೊಂದು ಇವೆಯೇನು? ಹಾಗೆಯೇ ಬೇಸಗೆ ಮತ್ತು ಚಳಿಗಾಲಗಳೆಂಬ ಋತುಗಳೂ ಸಹ ಬೇರೆ ಬೇರೆಯಾಗಿವೆ.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Provision there is for inequality in the working of creation,
Observe the mountains, rivers and forests of the world,
Does any flower, fruit or leaf resemble another
of its kind? What about summer and winter? – Marula Muniya
(Translation from "Thus Sang Marula Muniya" by Sri. Narasimha Bhat)