ಪುರುಷ ಪ್ರಕೃತಿಯರ ಪರಸ್ಪರಾನ್ವೇಷಣೆಯೆ (50)

ಪುರುಷ ಪ್ರಕೃತಿಯರ ಪರಸ್ಪರಾನ್ವೇಷಣೆಯೆ
ನಿರವಧಿಕ ವಿಶ್ವ ಜೀವ ವಿಲಾಸ ಜಲಧಿ ||
ತೆರೆಯೊಂದು ನಾನಾಸಮುದ್ರದೊಳಗೆಂದಿರ‍್ಪ |

ಸರಸತೆಯೆ ಸದ್ಗತಿಯೊ - ಮರುಳ ಮುನಿಯ || (೫೦)

(ಪರಸ್ಪರ+ಅನ್ವೇಷಣೆಯೆ)(ತೆರೆ+ಒಂದು)(ನಾನಾ ಸಮುದ್ರದ+ಒಳಗೆ+ಎಂದಿರ‍್ಪ) 

 ಪುರುಷ ಮತ್ತು ಪ್ರಕೃತಿಯರ ಒಬ್ಬರನೊಬ್ಬರ ಹುಡುಕುವಿಕೆಯೇ (ಅನ್ವೇಷಣೆಯೆ) ಪ್ರಪಂಚದ ಜೀವಿಗಳ ಮಿತಿಯಿಲ್ಲದ (ನಿರವಧಿಕ) ಕ್ರೀಡೆ. ಒಂದೇ ಒಂದು ಅಲೆಯು ಅನೇಕ ಸಮುದ್ರಗಳಲ್ಲಿ ಇರುವ ಚೆಲ್ಲಾಟವೇ ಅದಕ್ಕೆ ಮೋಕ್ಷ ದೊರಕುವಂತೆ ಮಾಡುತ್ತದೆ. ಒಂದು ಆತ್ಮವು ಬೇರೆ ಬೇರೆ ಸ್ಥಳಗಳಲ್ಲಿ ಜನ್ಮತಾಳಿ ಆಟವಾಡಿ ಮೋಕ್ಷವನ್ನು ಪಡೆಯುತ್ತದೆ.

ಸಂತಾನ ಸಾವಿರಗಳೊಂದೆ ಬೀಜದೊಳಡಕ (49)

ಸಂತಾನ ಸಾವಿರಗಳೊಂದೆ ಬೀಜದೊಳಡಕ |
ಸ್ವಾಂತವೊಂದರೊಳೆ ಭಾವ ಸಹಸ್ರವಡಕ ||
ಸಾಂತ ನರದೇಹದೊಳನಂತ ಚೇತನವಡಕ |
ಚಿಂತಿಸೀ ಸೂಕ್ಷವನು - ಮರುಳ ಮುನಿಯ || (೪೯)


‎(ಸಾವಿರಗಳು+ಒಂದೆ)(ಬೀಜದ+ಒಳು+​ಅಡಕ)(ಸ್ವಾಂತ+ಒಂದರ+ಒಳೆ)(ಸಹಸ್​ರವು+ಅಡಕ)
(ನರದೇಹದ+ಒಳು+ಅನಂತ)(ಚೇತನವು+ಅ​ಡಕ)(ಚಿಂತಿಸು+ಈ)

ಒಂದೇ ಒಂದು ಬೀಜದಿಂದ ಸಾವಿರಾರು ಸಂತಾನಗಳು ಉತ್ಪತ್ತಿಯಾಗುತ್ತವೆ. ಒಂದು ಮನಸ್ಸಿನ (ಸ್ವಾಂತ) ಒಳಗಡೆ ಸಹಸ್ರಾರು ಆಲೋಚನೆಗಳು ಅಡಗಿರುತ್ತವೆ. ಕೊನೆಗಳ್ಳತಕ್ಕಂತಹ (ಸಾಂತ) ಮನುಷ್ಯನ ದೇಹದಲ್ಲಿ ಕೊನೆಯಿಲ್ಲದ (ಅನಂತ) ಚೈತನ್ಯ(ಚೇತನ)ಗಳು ಅಡಕವಾಗಿವೆ. ಈ ವಿಚಾರವನ್ನು ಕುರಿತು ಯೋಚಿಸು.

ಸರ್ವೋಽಹಮಿಂದೆ ನಿರ್ಮೂಲಮಪ್ಪುದಹಂತೆ (48)

ಸರ್ವೋಽಹಮಿಂದೆ ನಿರ್ಮೂಲಮಪ್ಪುದಹಂತೆ|
ನಿರ್ವಿಕಾರದ ಶಾಂತಿ ನಿರಹಂತೆಯಿಂದೆ ||
ನಿರ್ವಾಂಛೆ ಶಾಂತಿಯಿಂದದು ಸರ್ವಸಮದೃಷ್ಟಿ|
ಸರ್ವಾತ್ಮ್ಯವಾನಂದ - ಮರುಳ ಮುನಿಯ || (೪೮)


(ಸರ್ವೋಽಹಂ+ಇಂದೆ)(ನಿರ್ಮೂಲಂ+​ಅಪ್ಪುದು+ಅಹಂತೆ)(ಶಾಂತಿಯಿಂದ+ಅ​ದು)

ಸರ್ವವೂ ನಾನೇ ಎಂಬ ಭಾವನೆಯಿಂದ (ಸರ್ವೋಽಹಂ) ಅಹಂಕಾರವು (ಅಹಂತೆ) ನಿರ್ಮೂಲವಾಗುತ್ತದೆ. ಈ ಅಹಂಕಾರ ಭಾವನೆ ಇಲ್ಲದಿರುವುದರಿಂದ ತಳಮಳವಿಲ್ಲದ ನೆಮ್ಮದಿ ದೊರಕುತ್ತದೆ. ಬಯಕೆಗಳಿಲ್ಲದಿರುವುದರಿಂದ (ನಿರ್ವಾಂಛೆ), ನೆಮ್ಮದಿ ಮತ್ತು ಎಲ್ಲರನ್ನೂ ಸಮನಾಗಿ ನೋಡುವ ಭಾವನೆಯುಂಟಾಗಿ ಆನಂದಕ್ಕೆ ಕಾರಣವಾಗುತ್ತದೆ.

ಏಕದಿನನೇಕಗಳು ಸಾಕಾರನಾಮಗಳು (47)

ಏಕದಿನನೇಕಗಳು ಸಾಕಾರನಾಮಗಳು |
ಲೋಕವಿದು ನೋಡೆ ನೀಂ (ಕೃತ್ಸ್ನ ದರ್ಶನದಿಂ) ||
ಏಕದೊಳ್ ನೀನು ಸಾಕಲ್ಯವನ್ನನುಭವಿಸೆ |
ಸಾಕಲ್ಯಯೋಗವದು - ಮರುಳ ಮುನಿಯ || (೪೭)


(ಏಕದಿಂ+ಅನೇಕಗಳು) (ಸಾಕಲ್ಯವನ್+ಅನುಭವಿಸೆ)

ನೀನು ಪೂರ್ಣವಾಗಿ(ಕೃತ್ಸ್ನ ದರ್ಶನದಿಂ) ಈ ಪ್ರಪಂಚವನ್ನು ಕಂಡಾಗ, ಇದು ಒಂದರಿಂದ ಬಹುವಾಗಿ ಆಗಿರುವ ವಿಧವಿಧವಾದ ರೂಪ (ಸಾಕಾರ) ಮತ್ತು ಹೆಸರು(ನಾಮ)ಗಳಿಂದ ಕೂಡಿರುವ ಪ್ರಪಂಚವೆಂದು ತಿಳಿಯುತ್ತದೆ. ನಿನ್ನ ಏಕತೆಯಲ್ಲಿಯೇ ನೀನು ಪ್ರಪಂಚದೆಲ್ಲವನ್ನೂ ಅನುಭವಿಸಿದಲ್ಲಿ ಪರಿಪೂರ್ಣತೆ(ಸಾಕಲ್ಯ)ಯ ಪ್ರಾಪ್ತಿಯಾಗುತ್ತದೆ.

ಈಶನಿಚ್ಛೆ ಸಮುದ್ರ ನೀನದರೊಳೊಂದು ಕಣ (46)

ಈಶನಿಚ್ಛೆ ಸಮುದ್ರ ನೀನದರೊಳೊಂದು ಕಣ |
ಲೇಶದೊಳಗರಸುವೆಯ ರಾಶಿಯಮಿತವನು ? ||
ರಾಶಿಯೆಲ್ಲವ ಕಾಣ್ಬೊಡದರೊಳಗೆ ಕರಗಿ ಬೆರೆ |
ನಾಶವಕ್ಕೆ ಪೃಥಕ್ತ್ವ - ಮರುಳ ಮುನಿಯ || (೪೬)

‎(ಈಶನ+ಇಚ್ಛೆ)(ನೀನು+ಅದರ+ಒಳು+​ಒಂದು)(ಲೇಶದ+ಒಳಗೆ+ಅರಸುವೆಯ)
(ರಾಶಿಯ+ಅಮಿತವನು)(ಕಾಣ್ಬೊಡೆ+ಅ​ದರ+ಒಳಗೆ)

ಪರಮಾತ್ಮನ ಅಪೇಕ್ಷೆ(ಇಚ್ಛೆ)ಯಿಂದ ಈ ಬ್ರಹ್ಮಾಂಡ ಸಾಗರದ ನಿರ್ಮಾಣವಾಗಿದೆ. ನೀನು ಆ ಸಾಗರದ ಒಂದು ಸಣ್ಣ ಕಣ ಮಾತ್ರ. ಹೀಗಿರುವಾಗ, ಈ ಸ್ವಲ್ಪ(ಲೇಶ)ದರಲ್ಲಿ ನೀನು ರಾಶಿಯ ಅಪಾರತೆ(ಅಮಿತ)ಯನ್ನು ಹುಡುಕು(ಅರಸು)ವೆಯೇನು? ಇದು ಅಸಾಧ್ಯವಾದ ಕೆಲಸ. ನೀನಾದರೋ ಒಂದು ಕಣ. ಅದು ಅಪಾರ ರಾಶಿ. ಈ ಸಂಪೂರ್ಣ ರಾಶಿಯನ್ನು ಕಾಣಬೇಕೆಂದರೆ, ನೀನು ಅದರ ಒಳಗೆ ಕರಗಿ ಬೆರೆತು ಹೋಗು. ಯಾವಾಗ ನೀನು ಅದರ ಒಂದು ಭಾಗವಾಗುವೆಯೋ ಆವಾಗ ನೀನು ರಾಶಿಯ ಅಪಾರತೆಯನ್ನು ಕಾಣಲಿಕ್ಕಾಗುತ್ತದೆ. ಈ ಕರಗುವಿಕೆಯಲ್ಲಿ ನಿನಗೆ ಇನ್ನೂ ಒಂದು ಲಾಭ ಉಂಟು. ಅದು, ನಿನ್ನ ಅಹಂ ಮತ್ತು ಬೇರೆತನದ ಅರಿವು(ಪೃಥಕ್ತ್ವ) ನಾಶವಾಗಲಿಕ್ಕೆ ಕಾರಣವಾಗುತ್ತದೆ.

ಕ್ಷಣವಮೂರ್ತಾನಂತ ಕಾಲದುಪಕೃತಿ ಮೂರ್ತಿ (45)

ಕ್ಷಣವಮೂರ್ತಾನಂತ ಕಾಲದುಪಕೃತಿ ಮೂರ್ತಿ |
ಕಣವಮೇಯಾದಿ ವಸ್ತುವಿನಮೇಯಮುಖ ||
ಕ್ಷಣಿಕವನುಪೇಕ್ಷಿಪೆಯ? ಗಮಕವದನಂತಕ್ಕೆ |
ಅಣು ಮಹತ್ಪ್ರತಿನಿಧಿಯೊ - ಮರುಳ ಮುನಿಯ || (೪೫)


(ಕ್ಷಣವು+ಅಮೂರ್ತ+ಅನಂತ)(ಕಾಲದ​+ಉಪಕೃತಿ)(ಕಣವು+ಅಮೇಯ+ಆದಿ)
(ಕ್ಷಣಿಕವನು+ಉಪೇಕ್ಷಿಪೆಯ)(ಗಮಕ​ವದು+ಅನಂತಕ್ಕೆ)(ಮಹತ್+ಪ್ರತಿನಿ​ಧಿಯೊ)

ಕ್ಷಣ ಎನ್ನುವುದಕ್ಕೆ ಆಕಾರವಿಲ್ಲ (ಅಮೂರ್ತ) ಮತ್ತು ಅದಕ್ಕೆ ಕೊನೆಯೂ ಇಲ್ಲ (ಅನಂತ). ಸಮಯದ ನೆರವಿನಿಂದ (ಉಪಕೃತಿ) ಮೂರ್ತಿಯು ದೊರಕುತ್ತದೆ. ಕಣವು ಅಳೆತಕ್ಕೆ ಸಿಗದಂತಹ (ಅಮೇಯ) ಪದಾರ್ಥದ, ಅಳೆತಕ್ಕೆ ಸಿಗುವ (ಮೇಯ) ಮುಖ. ಅಶಾಶ್ವತ(ಕ್ಷಣಿಕ)ವಾಗಿರುವುದನ್​ನು ನೀನು ಅಲಕ್ಷಿಸುವೆಯೇನು (ಉಪೇಕ್ಷಿಪೆಯ)? ಶಾಶ್ವತವಾಗಿರುವುದಕ್ಕೆ (ಅನಂತ) ಅದು ಸಾಕ್ಷಿ (ಗಮಕ). ಏಕೆಂದರೆ ಕ್ಷಣಿಕವಾಗಿರುವುದರಿಂದ ನಾವು ಶಾಶ್ವತವಾಗಿರುವುದರ ಇರುವಿಕೆಯನ್ನು ತಿಳಿಯಬಹುದು. ಇಲ್ಲದಿದ್ದರೆ ಇಲ್ಲ. ಅಣು ಇದರ ಮಹತ್ತಿನ ಪ್ರತಿನಿಧಿ.

ಲೋಕ ಜೀವನದೊಳೇಕೀಭವಿಸುತಂ ಪ್ರ- (44)

ಲೋಕ ಜೀವನದೊಳೇಕೀಭವಿಸುತಂ ಪ್ರ-|
ತ್ಯೇಕ ತಾನೆಂಬೆಣಿಕೆಗೆಡೆಗೊಡದೆ ಮನದಿ ||
ಸಾಕಲ್ಯ ಲೋಕದಲಿ ತನ್ನತಾಂ ಮರೆತಿರ‍್ಪ |
ನಾಕಾಶದಿಂ ಮೇಲೆ -ಮರುಳ ಮುನಿಯ || (೪೪)

 ‎(ಜೀವನದ+ಒಳು+ಏಕೀಭವಿಸುತಂ)(ತಾ​ನ್+ಎಂಬ+ಎಣಿಕೆಗೆ+ಎಡೆಗೊಡದೆ)
(ಮರೆತಿರ‍್ಪನ್+ಆಕಾಶದಿಂ)

ಪರಮಾತ್ಮನು ಪ್ರಪಂಚದ ಜೀವನದಲ್ಲಿ ಒಂದಾಗಿರುತ್ತ (ಏಕೀಭವಿಸುತಂ), ತಾನೇ ಬೇರೆ ಎಂಬ ಆಲೋಚನೆಗೆ ತನ್ನ ಮನಸ್ಸಿನಲ್ಲಿ ಆಸ್ಪದವನ್ನು ಕೊಡದೆ, ಪರಿಪೂರ್ಣ (ಸಾಕಲ್ಯ) ಲೋಕದಲ್ಲಿ ತನ್ನನ್ನು ತಾನೇ ಮರೆತು ಆಕಾಶದ ಮೇಲಿರುವನು.

ಎರಡು ಪಕ್ಕಗಳು ನಿನ್ನ ಜೀವನದ ಪಾಂಥಕ್ಕೆ (43)

ಎರಡು ಪಕ್ಕಗಳು ನಿನ್ನ ಜೀವನದ ಪಾಂಥಕ್ಕೆ |
ಪರತತ್ತ್ವವೊಂದು ಲೋಕದ ಮಾಯೆಯೊಂದು ||
ತೊರೆಯಲಾಗದು ನೀನದಾವುದನು ನಿಚ್ಚಮುಂ |
ಮರೆಯ ಬೇಡೊಂದನುಂ - ಮರುಳ ಮುನಿಯ || (೪೩)


(ತೊರೆಯಲು+ಆಗದು)(ನೀನು+ಅದು+ಆ​ವುದನು)(ಬೇರೆ+ಒಂದನುಂ)

ನಿನ್ನ ಜೀವನದ ದಾರಿಗೆ (ಪಾಂಥಕ್ಕೆ) ಎರಡು ಪಕ್ಕಗಳಿವೆ. ಪರಮಾತ್ಮನ ಸತ್ತ್ವ ಒಂದು ಮತ್ತು ಈ ಪ್ರಪಂಚದ ಮಾಯೆ ಇನ್ನೊಂದು. ನೀನು ಯಾವಾಗಲೂ (ನಿಚ್ಚಮುಂ) ಈ ಯಾವುದನ್ನೂ ಬಿಡಲಾಗುವುದಿಲ್ಲ. ನೀನು ಇವೆರಡನ್ನೂ ನಿಭಾಯಿಸಲೇಬೇಕು. ಆದುದರಿಂದ ಇವೆರಡರಲ್ಲಿ ಯಾವುದೊಂದನ್ನೂ ಮರೆಯಬೇಡ.

ಉದಧಿಯಲಿ ನದಿನದಗಳುದಕ ಭೇದಗಳೈಕ್ಯ (42)

ಉದಧಿಯಲಿ ನದಿನದಗಳುದಕ ಭೇದಗಳೈಕ್ಯ |
ಬದುಕಿನಲಿ ಮತ(ರೀತಿ)ಭೇದಂಗಳೈಕ್ಯ ||
ಸಮದಲಾತ್ಮದೊಳೆಲ್ಲ ಲೋಕಭೇದಗಳೈಕ್ಯ |
ಇದಿರಿಗಿಹುದೇಕಾತ್ಮ - ಮರುಳ ಮುನಿಯ || (೪೨)


(ನದಿನದಗಳಾ+ಉದಕ)(ಭೇದಗಳೂ+ಐಕ್​ಯ)(ಭೇದಂಗಳೂ+ಐಕ್ಯ)(ಸಮದಲ+ಆತ್ಮ​ದ+ಒಳು+ಎಲ್ಲ)(ಲೋಕಭೇದಗಳು+ಐಕ್ಯ​)(ಇದಿರಿಗೆ+ಇಹುದು+ಏಕಾತ್ಮ)

ಹೆಣ್ಣು ನದಿ ಮತ್ತು ಗಂಡು ನದಿ(ನದ)ಗಳ ನೀರು(ಉದಕ)ಗಳ ವ್ಯತ್ಯಾಸಗಳು (ಭೇದಗಳು) ಅವು ಸಮುದ್ರ (ಉಧದಿ)ವನ್ನು ಸೇರಿದ ತಕ್ಷಣ ಮರೆಯಾಗಿ ಹೋಗುತ್ತವೆ. ಹಾಗೆಯೇ ನಮ್ಮ ದಿನನಿತ್ಯದ ಜೀವನದಲ್ಲಿಯೂ ಸಹ ವಿಧವಿಧವಾದ ವಿಚಾರ ಮತ್ತು ರೀತಿಗಳ ವ್ಯತ್ಯಾಸಗಳು ಸಮರಸಗೊಳ್ಳುತ್ತವೆ. ನಿರ್ಮಲ ಮತ್ತು ಪವಿತ್ರ(ಸಮದಲ)ವಾಗಿರುವ ಆತ್ಮದ ಒಳಗೆ ಈ ಪ್ರಪಂಚದ ವ್ಯತ್ಯಾಸಗಳೆಲ್ಲವೂ ಒಂದಾಗಿಹೋಗುತ್ತವೆ. ನಮ್ಮಗಳ ಎದುರಿನಲ್ಲಿ (ಇದಿರಿಗೆ) ಇರುವುದು ಭೇಧವಿಲ್ಲದ ಒಂದೇ ಒಂದು (ಏಕ) ಆತ್ಮ, ಅದು ಪರಮಾತ್ಮ.

ಲೀನವಿಹವೀಶನಲಿ ಸತ್ಯಗಳು ಮಿಥ್ಯೆಗಳು (41)

ಲೀನವಿಹವೀಶನಲಿ ಸತ್ಯಗಳು ಮಿಥ್ಯೆಗಳು |
ಮಾನಗಳು ಮೇಯಗಳು ಪ್ರಕೃತಿ ಮಾಯೆಗಳು ||
ಭಾನಗಳಭಾನಗಳು ಪೂಜ್ಯಗಳಪೂಜ್ಯಗಳು |
ಸೂನೃತಗಳಘಬೀಜ - ಮರುಳ ಮುನಿಯ || (೪೧)


‎(ಲೀನ+ಇಹುವು+ಈಶನಲಿ)(ಭಾನುಗಳು​+ಅಭಾನಗಳು)(ಪೂಜ್ಯಗಳು+ಅಪೂಜ್ಯಗ​ಳು)(ಸೂನೃತಗಳ+ಅಘಬೀಜ)

ಪರಮಾತ್ಮನಲಿ ನಿಜ ಮತ್ತು ಸುಳ್ಳು(ಮಿಥ್ಯೆ)ಗಳು, ಅಳತೆ(ಮಾನ)ಗಳು, ಜ್ಞಾನ(ಭಾನ) ಮತ್ತು ಅಜ್ಞಾನಗಳು (ಅಭಾನಗಳು), ಪೂಜಿಸಲ್ಪಡತಕ್ಕುವು ಮತ್ತು ಪೂಜಿಸಲ್ಪಡಬಾರದವು ಸೇರಿಹೋಗಿವೆ. ಅವನು ಹೀಗೆ ಸತ್ಯವೂ ಹಿತವೂ ಆದ ಪುಣ್ಯ (ಸೂನೃತ) ಮತ್ತು ಪಾಪಗಳ (ಅಘ) ಉತ್ಪತ್ತಿಸ್ಥಾನಕಾರ(ಬೀಜ)ನಾಗಿರ​ುವನು.