ಮರದ ತುದಿಯಲ್ಲಿ ತನ್ನ ಕೈಗೆಟುಗದಿಹ ಹೂವ (377)

ಮರದ ತುದಿಯಲ್ಲಿ ತನ್ನ ಕೈಗೆಟುಗದಿಹ ಹೂವ - |
ನರುಮೆ ಕಣ್ಣಿಂ ನೋಡಿ ನಲೆಯೆ ಕಲಿತವನು ||
ಕಿರಿಮೊಗ್ಗು ನೆರೆದರಳುವುದನೋಡಿ ಸುಯ್ವವನು |
ಗುರುವಾಗಿರಲಿ ನಿನಗೆ - ಮರುಳ ಮುನಿಯ || (೩೭೭)

(ಕೈಗೆ+ಎಟುಗದೆ+ಇಹ)(ಹೂವನ್+ಅರುಮೆ)(ನೆರೆದು+ಅರಳುವುದ+ನೋಡಿ)(ಸುಯ್ವ+ಅವನು)

ಒಂದು ಮರದ ತುದಿಯಲ್ಲಿ ತನ್ನ ಕೈಗೆ ಸಿಗದಿರುವಂತೆ ಬಿಟ್ಟಿರುವ ಹೂವನ್ನು ಪ್ರೀತಿ(ಅರುಮೆ)ಯ ಕಣ್ಣುಗಳಿಂದ ಕಂಡು ಸಂತೋಷಿಸುವುದನ್ನು ತಿಳಿದುಕೊಂಡವನು ಮತ್ತು ಚಿಕ್ಕ ಮೊಗ್ಗುಗಳು ಗಿಡದಲ್ಲಿ ತುಂಬಿಕೊಂಡು ಅರಳುವುದನ್ನು ವೀಕ್ಷಿಸಿ ಉಸಿರು ಬಿಡುವವನು, ನಿನಗೆ ಗುರುವಾಗಿರಲಿ.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Accept the one who dances in the joy on seeing the flowers on tree tops
With admiring eyes even though they are unreachable
And the one who breathes in joy on seeing the blossoming buds
As your Preceptor – Marula Muniya
(Translation from "Thus Sang Marula Muniya" by Sri. Narasimha Bhat)

ರೋಚಕಂಗಳ ರಚಿಸಿ ಭೂ ಭೋಜ್ಯ ಶಾಲೆಯಲಿ (376)

ರೋಚಕಂಗಳ ರಚಿಸಿ ಭೂ ಭೋಜ್ಯ ಶಾಲೆಯಲಿ |
ಪಾಚನಕ್ರಮದ ರಸಸಾರ ಸಾಧನೆಗೆ ||
ಸೂಚಿಸುತ ಸೌಂದರ್ಯ ಮೂಲ ಪಾಠವ ಕಲಿಸು- |
ವಾಚಾರ್ಯನೇ ಪ್ರಕೃತಿ - ಮರುಳ ಮುನಿಯ || (೩೭೬)

(ಕಲಿಸುವ+ಆಚಾರ್ಯನೇ)

ಆಕರ್ಷಕ ವಸ್ತುಗಳನ್ನು (ರೋಚಕಂಗಳ) ನಿರ್ಮಿಸಿ, ಈ ಭೂಮಿಯ ಭೋಜನ ಶಾಲೆಯಲ್ಲಿ, ರಸಭರಿತವಾದ ಅಡುಗೆಯನ್ನು ತಯಾರಿಸುವ ವಿಧಾನಗಳನ್ನು ತೋರಿಸಿಕೊಡುತ್ತಾ, ಸೊಬಗುಗಳ ಮೊದಲ ಪಾಠವನ್ನು (ಮೂಲಪಾಠ) ತಿಳಿಸಿಕೊಡುವ ಗುರುವೇ ಪ್ರಕೃತಿ.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")
 

Nature prepares delicious dishes in the kitchen, the world
He teaches us how to cook the most tasty dishes
He imparts the basic lessons in aesthetics,
Such a great preceptor is Nature – Marula Muniya
(Translation from "Thus Sang Marula Muniya" by Sri. Narasimha Bhat)

ಆಗಸದ ಲೋಲಗಳ ಖಗಕುಲೋಡ್ಡೀನಗಳ (375)

ಆಗಸದ ಲೋಲಗಳ ಖಗಕುಲೋಡ್ಡೀನಗಳ |
ಸಾಗರೋರ್ಮಿಗಳ ತರುಶಿರದ ಜಲಕಣದಾ ||
ಬಾಗು ಗುಂಡುಗಳ ಚಂದವ ಕಣ್ಗೆ ಕಲಿಸುತಿಹ |
ಮಾಗುರುವು ಸೃಷ್ಟಿಯಲೆ - ಮರುಳ ಮುನಿಯ || (೩೭೫)

(ಕುಲ+ಉಡ್ಡೀನಗಳ)(ಸಾಗರ+ಊರ್ಮಿಗಳ)(ಕಲಿಸುತ+ಇಹ)

ಆಕಾಶ(ಆಗಸ)ದಲ್ಲಿರುವ ಗುಂಡಾಗಿರುವ ವಸ್ತುಗಳನ್ನು, ಹಕ್ಕಿ(ಖಗ)ಯ ಜಾತಿಗೆ ಸೇರಿದವುಗಳ ಹಾರಾಟ(ಉಡ್ಡೀನ)ಗಳನ್ನು, ಸಮುದ್ರದ ಅಲೆ(ಊರ್ಮಿ)ಗಳ, ಗಿಡಗಳ ತುದಿಯ ಮತ್ತು ನೀರಿನ ಹನಿಗಳ, ಧಾರೆ ಮತ್ತು ಮುತ್ತಿನ ಚೆಲುವುಗಳನ್ನು ನಿನ್ನ ಕಣ್ಣುಗಳಿಗೆ ಬೋಧೆಯಾಗುವಂತೆ ಮಾಡುತ್ತಿರುವ ಮಾಹಾಗುರುವು ಸೃಷ್ಟಿತಾನೆ?
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Nature is the great preceptor who teaches your eyes to enjoy
The beauty of the celestial orbs and of the flying sky-birds
The beauty of the curved ocean waves and of the round water drops on the tree tops
Such a great preceptor is Nature – Marula Muniya (375)
(Translation from "Thus Sang Marula Muniya" by Sri. Narasimha Bhat)

ಅರುಣಿಮೆಯ ಸಂಜೆಗಳ ನೀಲಿಮೆಯ ನಭತಲವ (374)

ಅರುಣಿಮೆಯ ಸಂಜೆಗಳ ನೀಲಿಮೆಯ ನಭತಲವ |
ಹರಿತವನಶಾದ್ವಲವ ತಾಮ್ರಪಲ್ಲವವ ||
ಪರಿಪರಿಯ ಬಣ್ಣ ಸೊಬಗುಗಳ ಕಣ್ಣಿಗೆ ಕಲಿಪ |
ಗುರುವಾರು ಪ್ರಕೃತಿಯಲೆ - ಮರುಳ ಮುನಿಯ || (೩೭೪)

(ಗುರು+ಆರು)(ಪ್ರಕೃತಿ+ಅಲೆ)

ಸೂರ್ಯನು ಸಾಯಂಕಾಲದ ಹೊತ್ತು ಮುಳುಗುವಾಗ ಕಾಣುವ ನಸುಗೆಂಪು(ಅರುಣಿಮೆ) ಬಣ್ಣವನ್ನು, ನೀಲಿಯಾಗಿ ಕಾಣುವ ಆಕಾಶ(ನಭ)ದ ಸ್ಥಳವನ್ನು, ಹಸಿರು (ಹರಿತ) ಬಣ್ಣವಾಗಿ ಕಾಣುತ್ತಿರುವ ಕಾಡಿನ ಹುಲ್ಲುಗಾವಲುಗಳನ್ನು (ಶಾದ್ವಲ), ಕೆಂಪು(ತಾಮ್ರ)ಬಣ್ಣದಿಂದ ಒಡಗೂಡಿರುವ ಗಿಡಗಳ ಚಿಗುರು(ಪಲ್ಲವ)ಗಳನ್ನು ಮತ್ತು ಈ ರೀತಿ ವಿಧವಿಧವಾದ ವರ್ಣಗಳನ್ನು ಮತ್ತು ಅಂದಗಳನ್ನು ನಿನ್ನ ಕಣ್ಣುಗಳಿಗೆ ಕಾಣಿಸಿಕೊಡುವ ಗುರು ಯಾರು? ಪ್ರಕೃತಿ ತಾನೆ?
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Nature is the great preceptor who teaches your eyes to enjoy
The beauty of the red rosy evenings and the blue sky
The grace of green wild vegetation and the copper red springs
And the wide variety of colors – Marula Muniya (374)
(Translation from "Thus Sang Marula Muniya" by Sri. Narasimha Bhat)

ಸ್ವಾದುಗಳ ನಾಲಗೆಗೆ ರಾಗಗಳ ಕಂಗಳಿಗೆ (373)

ಸ್ವಾದುಗಳ ನಾಲಗೆಗೆ ರಾಗಗಳ ಕಂಗಳಿಗೆ |
ನಾದ ಸರಗಳ ಕಿವಿಗೆ ಸುರಭಿಯುನುಸಿರ್ಗೆ   ||
ಮಾಧುರಿಯ ರಸಭಾವಗಳ ಮನಕೆ ಕಲಿಸುತಿರು - |
ವಾದಿಗುರು ಸೃಷ್ಟಿಯಲೆ - ಮರುಳ ಮುನಿಯ || (೩೭೩)

(ಸುರಭಿಯುನ್+ಉಸಿರ್ಗೆ)(ಕಲಿಸುತಿರುವ+ಆದಿಗುರು)(ಸೃಷ್ಟಿ+ಅಲೆ)

ಮಧುರವಾದ ರುಚಿಗಳನ್ನು (ಸ್ವಾದುಗಳ) ನಿನ್ನ ನಾಲಿಗೆಗೆ, ವಿಧವಿಧವಾದ ಬಣ್ಣಗಳನ್ನು (ರಾಗಗಳ) ನಿನ್ನ ಕಣ್ಣುಗಳಿಗೆ, ಶಬ್ಧಗಳ ಇಂಪಾದ ಧ್ವನಿ(ಸರ)ಗಳನ್ನು ನಿನ್ನ ಕಿವಿಗಳಿಗೆ, ಸುವಾಸನೆ(ಸುರಭಿ)ಗಳನ್ನು ನಿನ್ನ ನಾಸಿಕಕ್ಕೆ, ಮನೋಹರ (ಮಾಧುರಿ)ವಾದ ನವರಸ ಭಾವನೆಗಳನ್ನು ನಿನ್ನ ಮನಸ್ಸಿಗೆ ಅರಹುತ್ತಿರುವ, ಮೂಲಗುರು ಸೃಷ್ಟಿ ತಾನೆ?
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Nature teaches tastes to the tongue and colors to the eyes
Sounds and musical notes to the ears and fragrance to the nose
She teaches sentiments and aesthetic emotions to the mind
Nature is your first Preceptor – Marula Muniya (373)
(Translation from "Thus Sang Marula Muniya" by Sri. Narasimha Bhat)

ಗುರುವಿಲ್ಲವೆನಬೇಡ ಜಗವೇ ಜಗದ್ಗುರುವೊ (372)

ಗುರುವಿಲ್ಲವೆನಬೇಡ ಜಗವೇ ಜಗದ್ಗುರುವೊ |
ಅರಿಮಿತ್ರ ವಿಭುಭೃತ್ಯ ಸತಿಪುತ್ರವರ್ಗ ||
ಪರಿಪರಿಯ ಪಾಠಗಳ ಕಲಿಸುತಿರ್ಪರು ನಿನಗೆ |
ಅರಿತುಕೊಳಲನುವಾಗು - ಮರುಳ ಮುನಿಯ || (೩೭೨)

(ಗುರು+ಇಲ್ಲ+ಎನಬೇಡ)(ಜಗತ್+ಗುರುವೊ)(ಕಲಿಸುತ+ಇರ್ಪರು)(ಅರಿತುಕೊಳಲ್+ಅನುವಾಗು)

ನನಗೆ ಯಾವ ಗುರುವೂ ಇಲ್ಲ ಎಂದೆನ್ನಬೇಡ. ಈ ಪ್ರಪಂಚವೇ ನಿನಗೆ ಎಲ್ಲಾ ಪಾಠಗಳನ್ನು ಕಲಿಸುವ ಜಗದ್ಗುರು. ಶತ್ರು(ಅರಿ), ಸ್ನೇಹಿತ(ಮಿತ್ರ), ಒಡೆಯ(ವಿಭು) ಸೇವಕ (ಭೃತ್ಯ), ಪತ್ನಿ, ಪುತ್ರ ಮತ್ತು ಇತರರು, ವಿಧವಿಧವಾದ ಪಾಠಗಳನ್ನು ನಿನಗೆ ಕಲಿಸುತ್ತಿದ್ದಾರೆ. ಈ ಪಾಠಗಳನ್ನು ಕಲಿತುಕೊಳ್ಳಲು ಸಿದ್ಧನಾಗು (ಅನುವಾಗು).
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Say not you have no preceptor, the world itself is the world teacher
Friend, foe, master, servant, wife and children
All these people teach you a variety of lessons
Be ready to learn – Marula Muniya (372)
(Translation from "Thus Sang Marula Muniya" by Sri. Narasimha Bhat)

ಜೀವನವೆ ಸಂಪತ್ತು, ಬೇರೆ ಸಂಪತ್ತೇಕೆ? (371)

ಜೀವನವೆ ಸಂಪತ್ತು, ಬೇರೆ ಸಂಪತ್ತೇಕೆ? |
ಭೂವಿಯಚ್ಚಿತ್ರಗಳಿನಗಲ್ದ ತಿಳಿಗಣ್ಣು ||
ಜೀವಲೋಕದ ದನಿಗೆ ಮರುದನಿಯ ಮಿಡಿಯುವುದೆ |
ದೈವ ಪ್ರಸಾದವು - ಮರುಳ ಮುನಿಯ || (೩೭೧)

(ಭೂಮಿಯತ್+ಚಿತ್ರಗಳಿನ್+ಅಗಲ್ದ)

ನಾವು ನಡೆಸುತ್ತಿರುವ ಜೀವನವೇ ಪರಮೈಶ್ವರ್ಯ. ಮಿಕ್ಕ ಇನ್ನಾವ ಐಶ್ವರ್ಯಗಳೂ ಬೇಕಿಲ್ಲ. ಭೂಮಿ ಮತ್ತು ಆಕಾಶ(ವಿಯತ್)ಗಳಲ್ಲಿ ಪ್ರಕೃತಿಯು ಸೃಷ್ಟಿಸಿರುವ ಚಿತ್ರಗಳನ್ನು ಕಂಡು ಹಿಗ್ಗದಿರುವ ನಿರ್ಮಲವಾದ ಕಣ್ಣುಗಳು, ಈ ಜಗತ್ತಿನಲ್ಲಿರುವ ಜೀವಿಗಳ ಧ್ವನಿಗೆ ಪ್ರತಿಧ್ವನಿಯನ್ನು ಕೊಟ್ಟು ಸ್ಪಂದಿಸುವುದೇನು? ಪರಮಾತ್ಮನು ನಮ್ಮ ಮೇಲೆ ತೋರಿಸಿರುವ ದಯೆ ಮತ್ತು ಅನುಗ್ರಹಗಳು ಇವು.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Life itself is wealth, what other wealth is greater than Life?
Do you enjoy the pictures of world and sky wide-eyed?
Does your heart echo the voices of the world of life?
These are the great gifts of God – Marula Muniya || (371)
(Translation from "Thus Sang Marula Muniya" by Sri. Narasimha Bhat)

ಸುಳ್ಳೇನೊ ದಿಟವೇನೊ ಜಗದ ನಂಬಿಕೆಗಳಲಿ (370)

ಸುಳ್ಳೇನೊ ದಿಟವೇನೊ ಜಗದ ನಂಬಿಕೆಗಳಲಿ |
ಕಲ್ಲೋಲವಹುದು ಮನವಾದೊಡಂಜಿಕೆಯೇಂ ? ||
ನೆಲ್ಲು ಬಾಣಲಿಯ ಬಿಸಿಯೊಳು ಹೊರಳುತರಳಾಗೆ |
ಸಲ್ಲುವುದು ಹಿತರುಚಿಗೆ - ಮರುಳ ಮುನಿಯ || (೩೭೦)

(ಕಲ್ಲೋಲ+ಅಹುದು)(ಮನವ+ಆದೊಡಂ+ಅಂಜಿಕೆ+ಏಂ)(ಬಿಸಿಯ+ಒಳು)(ಹೊರಳುತ+ಅರಳು+ಆಗೆ)

ಈ ಪ್ರಪಂಚದ ಭರವಸೆ, ವಿಶ್ವಾಸಗಳಲ್ಲಿ ನಿಜ ಮತ್ತು ಸುಳ್ಳು ಯಾವುದೆಂದು ಹೇಗೆ ತಿಳಿಯುವುದು? ಮನಸ್ಸು ಒಂದು ಬೃಹತ್ ಅಲೆಯಂತೆ (ಕಲ್ಲೋಲ) ಆದರೂ ಸಹ ಭೀತಿ (ಅಂಜಿಕೆ) ಏತಕ್ಕೆ? ಬತ್ತ(ನೆಲ್ಲು)ವು ಬಿಸಿ ಬಾಂಡಲೆಯಲ್ಲಿ ಹುರಿಯಲ್ಪಟ್ಟ, ಅರಳು ಆದರೆ, ಅದು ಬಾಯಿಯ ಅಸ್ವಾದನೆಗೆ ಹಿತಕರವಾಗಿರುತ್ತದೆ.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Which are true and which are false in the beliefs of men in the world?
Why do you fear even if your mind becomes agitated?
When the paddy grains in the burning pan roll on and blossom into popcorn
They become tasty and enjoyable – Marula Muniya (370)
(Translation from "Thus Sang Marula Muniya" by Sri. Narasimha Bhat)

ಅಜವಸ್ತುವೊಂದದರ ಛಾಯೆಯೊಂದೀಯೆರಡೆ (369)

ಅಜವಸ್ತುವೊಂದದರ ಛಾಯೆಯೊಂದೀಯೆರಡೆ |
ನಿಜಗಳೀ ವಿಶ್ವಜೀವನದ ಲೀಲೆಯಲಿ ||
ಭಜಿಸಿ ನೀಂ ವಸ್ತುವನು ಛಾಯೆಯಾಟವನಾಡೆ |
ಮೃಜಿತಮದುಮಪ್ಪುದೆಲೊ - ಮರುಳ ಮುನಿಯ || (೩೬೯)

(ಒಂದು+ಅದರ)(ಛಾಯೆ+ಒಂದು+ಈ+ಎರಡೆ)(ನಿಜಗಳು+ಈ)(ಛಾಯೆ+ಆಟವನ್+ಆಡೆ)(ಮೃಜಿತಂ+ಅದು+ಅಪ್ಪುದು+ಎಲೊ)

ಬ್ರಹ್ಮ(ಅಜ)ನೆಂಬ ವಸ್ತು ಒಂದು ಮತ್ತು ಮತ್ತೊಂದು ಅದರ ನೆರಳು. ಇವೆರಡೇ ಈ ಪ್ರಪಂಚದ ಬಾಳೆಂಬ ಆಟದಲ್ಲಿ ಸತ್ಯ. ನೀನು ಪರಮಾತ್ಮನನ್ನು ಪೂಜಿಸಿ (ಭಜಿಸಿ) ಆ ನೆರಳಿನ ಜೊತೆ ಆಟವನ್ನಾಡಿದರೆ, ಬದುಕು ಪರಿಶುದ್ಧ (ಮೃಜಿತ)ವಾಗುತ್ತದೆ.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Two things are only are true in the play of worldly life
One is the eternal Brahma and the other is His shadow
Singing His praise and playing the role of His shadow
You become the purest purity – Marula Muniya (369)
(Translation from "Thus Sang Marula Muniya" by Sri. Narasimha Bhat)

ಏನ ತಾಂ ತಂದುಕೊಂಡಿಹನು ತನ್ನಯ ಬಾಳ್ಗೆ (368)

ಏನ ತಾಂ ತಂದುಕೊಂಡಿಹನು ತನ್ನಯ ಬಾಳ್ಗೆ |
ಮಾನವಂ ಪ್ರಗತಿಯಂ ಸಾಧಿಪುಜ್ಜುಗದೊಳ್? ||
ಆನೆಯಡಿಗದು ಕೀಳ್ತ ಲತೆ ನಿಗಳವಾದಂತೆ |
ಜಾಣ್‍ತನದೆ ತನುಗುರುಳು - ಮರುಳ ಮುನಿಯ || (೩೬೮)

(ತಂದುಕೊಂಡು+ಇಹನು)(ಸಾಧಿಪ+ಉಜ್ಜುಗದ+ಒಳ್)(ಆನೆ+ಅಡಿಗೆ+ಅದು)(ತನುಗೆ+ಉರುಳು)

ಮನುಷ್ಯನು ಏಳಿಗೆಯನ್ನು ಈಡೇರಿಸುವ ಪ್ರಯತ್ನದಲ್ಲಿ ತನ್ನ ಜೀವನಕ್ಕೆ ತನಗೆ ತಾನೇ ಏನನ್ನು ತಂದುಕೊಂಡಿದ್ದಾನೆ? ಆನೆಯು ಬಳ್ಳಿಗಳನ್ನು ಕಿತ್ತನಂತರ ಅವು ಆ ಆನೆಯ ಕಾಲು(ಅಡಿ)ಗಳಿಗೇ ತೊಡರಿಕೊಂಡು ಅದಕ್ಕೆ ಸಂಕೋಲೆಯಾಗುವಂತೆ, ಮನುಷ್ಯನೂ ಸಹ ತನ್ನ ಅತಿ ಬುದ್ಧಿವಂತಿಕೆಯಿಂದ ತನ್ನ ದೇಹ(ತನು)ಕ್ಕೆ ಪಾಶ(ಉರುಳು)ವನ್ನು ಬಿಗಿದುಕೊಂಡಿದ್ದಾನೆ.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

What has man earned for his life
In his tireless endeavor to achieve progress?
Just as the uprooted creeper becomes a binding chain to the elephant’s leg
Man’s cleverness has become the killing noose around his neck – Marula Muniya
(Translation from "Thus Sang Marula Muniya" by Sri. Narasimha Bhat)