ಬೆರಲೈದು ಸಮವಾಗೆ ಕರೆಮಾಳ್ಪ ಕೆಲಸವೇಂ? (572)

ಬೆರಲೈದು ಸಮವಾಗೆ ಕರೆಮಾಳ್ಪ ಕೆಲಸವೇಂ? |
ಉರಶಿರಗಳೊಂದಾಗೆ ಸತಿಪತಿಯರೆಂತು? ||
ತರತಮವಿವೇಕದಿಂ ಗುಣಲಾಭ ಜೀವನಕೆ |
ಮರೆಯದಿರು ತರತಮವ - ಮರುಳ ಮುನಿಯ || (೫೭೨)

(ಉರಶಿರಗಳ್+ಒಂದಾಗೆ)(ಸತಿಪತಿಯರ್+ಎಂತು)(ಮರೆಯದೆ+ಇರು)

ಕೈಗಳಲ್ಲಿರುವ ಐದೂ ಬೆರಳುಗಳೂ ಒಂದೇ ಸಮನಾಗಿದ್ದರೆ ಕೈಯಿಂದ ಏನಾದರೂ ಕೆಲಸ ಮಾಡಲು ಸಾಧ್ಯವಾಗುತ್ತಿತ್ತೇನು? ಇಲ್ಲ. ಹಾಗೆಯೇ ಗಂಡು ಮತ್ತು ಹೆಣ್ಣಿನ ವಕ್ಷಸ್ಥಳ(ಉರ) ಮತ್ತು ತಲೆ(ಶಿರ)ಗಳೆರಡೂ ಒಂದೇ ರೀತಿ ಇದ್ದರೆ ಪತಿ ಪತ್ನಿಯರು ಹೇಗಾಗುತ್ತಾರೆ? ಈ ರೀತಿಯ ಹೆಚ್ಚು ಕಡಿಮೆಗಳ(ತರತಮ) ಗುಣದೋಷ ಪರಿಶೀಲನೆಗಳಿಂದ ಜೀವನಕ್ಕೆ ಬೇರೆ ಬೇರೆ ಸ್ವಭಾವಗಳ ಪ್ರಯೋಜನ ಉಂಟಾಗುತ್ತದೆ. ಆದುದರಿಂದ ಈ ಅಂತರಭೇದಗಳ ತಿಳುವಳಿಕೆಯನ್ನು ಮರೆಯಬೇಡ.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

What work can the hand do when all the five fingers are alike?
How can husband and wife be so if their heads and breasts are alike?
Proper discrimination is beneficial to human life
Forget not the differences based on quality – Marula Muniya
(Translation from "Thus Sang Marula Muniya" by Sri. Narasimha Bhat)