ಪ್ರೀತಿ ತಪ್ಪೇನಲ್ಲ ಆತುಮವು ಮಣ್ಣಲ್ಲ |
ಯಾತನೆಯನರಿಯದನ್ ಸುಖವರಿತನಲ್ಲ ||
ಆತುರದಿ ನೋಯ್ವೆದೆಯೆ ಬೆಂಕಿಸೋಕದ ನರನು |
ಪೂತಾತ್ಮನೆಂತಹನೊ - ಮರುಳ ಮುನಿಯ || (೫೬೬)
(ತಪ್ಪು+ಏನ್+ಅಲ್ಲ)(ಮಣ್ಣ್+ಅಲ್ಲ)(ಯಾತನೆಯನ್+ಅರಿಯದನ್)(ಸುಖವ+ಅರಿತನ್+ಅಲ್ಲ)(ನೋಯ್ವ+ಎದೆಯೆ)(ಪೂತ+ಆತ್ಮನ್+ಎಂತು+ಅಹನೊ)
ಪ್ರೀತಿಸುವುದು ತಪ್ಪೇನೂ ಅಲ್ಲ. ಒಂದು ಜೀವಿಯು ಇನ್ನೊಂದು ಜೀವಿಯನ್ನು ಒಲವಿನಿಂದ ಕಾಣುವುದು ಸರಿಯೇ ಹೌದು. ಆತ್ಮವು ಕೇವಲ ಜಡ ಮಣ್ಣಲ್ಲ. ಯಾವನು ನೋವು ಮತ್ತು ವೇದನೆಗಳನ್ನು ತಿಳಿದಿಲ್ಲವೋ, ಅವನು ಸುಖವನ್ನೂ ಸಹ ತಿಳಿದವನಲ್ಲ. ತವಕದಿಂದ ನೋಯುತ್ತಿರುವ ಹೃದಯದ ಬೆಂಕಿಯನ್ನು ಸೋಕದಿರುವ ಮನುಷ್ಯನು ಹೇಗೆ ಪವಿತ್ರ(ಪೂತ)ನಾದ ಆತ್ಮನಾಗುತ್ತಾನೆ?
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")
No comments:
Post a Comment