ಸಿರಿಯೇಕೊ ಸೌಖ್ಯಕ್ಕೆ? ಅರುಣಂಗೆ ಬಾಡಿಗೆಯೆ? (553)

ಸಿರಿಯೇಕೊ ಸೌಖ್ಯಕ್ಕೆ? ಅರುಣಂಗೆ ಬಾಡಿಗೆಯೆ?
ಧರೆಯ ದಿನದಿನದ ಬಣ್ಣಗಳಿಗೇಂ ಬೆಲೆಯೆ ?||
ಹರುಷವಂಗಡಿ ಸರಕೆ? ಹೃದಯದೊಳಚಿಲುಮೆಯದು |
ಸರಸತೆಯೆ ಸಿರಿತನವೊ - ಮರುಳ ಮುನಿಯ || (೫೫೩)

(ಹರುಷ+ಅಂಗಡಿ)(ಹೃದಯದ+ಒಳಚಿಲುಮೆಯದು)

ಸಂತೋಷವಾಗಿರುವುದಕ್ಕೆ ಸಿರಿಸಂಪತ್ತುಗಳು ಇರಲೇಬೇಕೇನು? ಸೂರ್ಯನ(ಅರುಣ) ಬೆಳಕಿಗೆ ಬಾಡಿಗೆ ಕೊಡಬೇಕೇನು? ಭೂಮಿತಾಯಿಯ ಪ್ರತಿನಿತ್ಯದ ವಿಧವಿಧವಾದ ರಂಗುಗಳಿಗೆ ಏನು ಬೆಲೆ? ಸಂತೋಷವೆನ್ನುವುದು ಅಂಗಡಿಯಲ್ಲಿ ನಾವು ಕೊಂಡುಕೊಳ್ಳುವುದಕ್ಕೆ ಸಿಗುವ ಸಾಮಗ್ರಿ(ಸರಕು) ಏನು? ಸಂತೋಷವೆನ್ನುವುದು ಹೃದಯದೊಳಗಿರುವ ಬುಗ್ಗೆ. ಸೌಜನ್ಯ ಮತ್ತು ರಸಿಕತೆಯಿಂದಿರುವುದೇ ಸಿರಿವಂತಿಕೆ.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

Why riches for happiness? Have you to pay any rent to enjoy the dawn?
Has any price been fixed for the myriad hues that adorn the earth every day?
Is happiness available in shops? It is the fountain in your heart,
Sense of humour itself is wealth – Marula Muniya (533)
(Translation from "Thus Sang Marula Muniya" by Sri. Narasimha Bhat)