ಸ್ವಚ್ಛಚೈತನ್ಯಸಾಗರದ ವೀಚಿಯೊ ನೀನು (143)

ಸ್ವಚ್ಛಚೈತನ್ಯಸಾಗರದ ವೀಚಿಯೊ ನೀನು |
ಸಚ್ಚಿದಾನಂದಸರಿದೂರ್ಮಿ ಕಣ ನೀನು ||
ಅಚ್ಛೇದ್ಯ ದಿವ್ಯತರು ಸುಮಪರಾಗವೊ ನೀನು |
ಅಚ್ಯುತಾಮೃತಬಿಂದು - ಮರುಳ ಮುನಿಯ || (೧೪೩)

(ಸತ್+ಚಿತ್+ಆನಂದಸರಿತ್+ಊರ್ಮಿ)(ಅಚ್ಯುತ+ಅಮೃತಬಿಂದು)

ನೀನು ಶುದ್ಧವಾದ ಚೇತನ ಸಮುದ್ರದ ಒಂದು ಅಲೆ (ವೀಚಿ) ಮತ್ತು ಆ ಪರಮಾತ್ಮನೆಂಬ ಹೊಳೆಯ (ಸರಿತ್) ಒಂದು ಅಲೆ(ಊರ್ಮಿ)ಯ ಸೂಕ್ಷ್ಮ ಅಂಶ. ಕತ್ತರಿಸಲಾಗದ (ಅಚ್ಛೇದ್ಯ) ಶ್ರೇಷ್ಠ (ದಿವ್ಯ) ಗಿಡ(ತರು)ದ ಹೂವಿ(ಸುಮ)ನ ಪರಾಗವೂ ನೀನೆ ಮತ್ತು ನಷ್ಟವಾಗದಿರುವಂತಹ (ಅಚ್ಯುತ) ಅಮೃತದ ಒಂದು ಹನಿ (ಬಿಂದು).