ಜಗವಖಿಲವಿದನಾದಿ ಜೀವ ಜೀವವನಾದಿ (67)

ಜಗವಖಿಲವಿದನಾದಿ ಜೀವ ಜೀವವನಾದಿ |

ಯುಗ-ಯುಗಕೆ ಭೇದವಂ ನಾಮರೂಪಗಳು ||

ಬಗೆಬಗೆಯ ಗುಣ ನೀತಿ ನಯ ಸಂಪ್ರದಾಯಗಳ್ |

ಮಿಗುವ ವಸ್ತುವದೊಂದೆ -ಮರುಳ ಮುನಿಯ || (೬೭)

(ಜಗವು+ಅಖಿಲ+ಇದು+ಅನಾದಿ)(ಜೀವವು+ಅನಾದಿ)(ವಸ್ತುವೌ+ಅದು+ಒಂದೆ)

ಈ ಪ್ರಪಂಚವು ಪೂರ್ತಿ ಇಡಿಯಾಗಿ(ಅಖಿಲ) ಇದೆ. ಇದು ಬಹಳ ಸಮಯದಿಂದಲೂ ಇದೆ (ಅನಾದಿ). ಅಂತೆಯೇ ಜೀವ ಜೀವಗಳು ಸಹ ಬಹುಕಾಲದಿಂದ ಇವೆ. ಒಂದು ಯುಗದಿಂದ ಮತ್ತೊಂದು ಯುಗಕ್ಕೆ ಹೆಸರು ಮತ್ತು ಆಕಾರಗಳಲ್ಲಿ ವ್ಯತ್ಯಾಸಗಳು ಕಂಡುಬರುತ್ತದೆ. ಅದಕ್ಕೆ ತಕ್ಕಂತೆ ವಿಧವಿಧವಾದ ಸ್ವಭಾವಗಳು, ಬೆಲೆಗಳು, ಒಳ್ಳೆಯ ನಡತೆಗಳ ನಿಯಮಗಳು, ನ್ಯಾಯ, ಧರ್ಮಗಳು ಮತ್ತು ಪರಂಪರೆಗಳು ಸಹ ಹುಟ್ಟಿಕೊಳ್ಳುತ್ತವೆ. ಇವುಗಳೆಲ್ಲವನ್ನೂ ನೋಡಿದನಂತರ ನಮಗೆ ಸಿಗುವ ವಸ್ತುವಾದರೋ ಅದು ಒಂದೇ ಒಂದು. ಇವೆಲ್ಲದರ ಹಿಂದೆ ಇರುವ ಪರಮಾತ್ಮನೆಂಬ ವಸ್ತು.