ಜಗವೆಲ್ಲ ಲೀಲೆ ಶಿವಲೀಲೆ ಶಾಶ್ವತ ಲೀಲೆ (109)

ಜಗವೆಲ್ಲ ಲೀಲೆ ಶಿವಲೀಲೆ ಶಾಶ್ವತ ಲೀಲೆ |
ನಗುವಳುವು ಸೆಣಸು ಹುಚ್ಚಾಟವದು ಲೀಲೆ ||
ಹಗುರವನು ಹೊರೆಮಾಡಿ ತಿಣುಕಾಡುವುದು ಲೀಲೆ |
ರಗಳೆಯೇ ಲೀಲೆಯೆಲೊ - ಮರುಳ ಮುನಿಯ || (೧೦೯)

(ಜಗ+ಎಲ್ಲ)(ನಗು+ಅಳುವು)

ಈ ಜಗತ್ತೆಲ್ಲವೂ ಒಂದು ವಿನೋದವಾದ ಆಟ. ಅದು ಪರಮಾತ್ಮನ ಆಟ ಮತ್ತು ಯಾವಾಗಲೂ ಇರತಕ್ಕಂತಹ ಆಟ. ಇದು ನಗು, ಅಳು, ಹೋರಾಟ(ಸೆಣಸು) ಹುಚ್ಚಾಟ ಎಲ್ಲವನ್ನು ಕೂಡಿಕೊಂಡಿರುವ ಆಟ. ಭಾರವಾಗಿಲ್ಲದಿರುವುದನ್ನು ಭಾರವಾಗಿಸಿ ಒದ್ದಾಡುವಂತೆ ಮಾಡುವ ಆಟಗಳಿವು. ಈ ಆಟಗಳೆಲ್ಲವೂ ತೊಂದರೆ ಮತ್ತು ಬಗೆಹರಿಯಲಾರದ ಸಮಸ್ಯೆಗಳೇ ಹೌದು.