ತೇಲಾಡುತಿಹುದು ಗಾಳಿಯ ಪಟದವೊಲು ಲೋಕ (113)

ತೇಲಾಡುತಿಹುದು ಗಾಳಿಯ ಪಟದವೊಲು ಲೋಕ |

ಕಾಲವದಕಾಕಾಶ ನೋಳ್ಪಮತಿಯೆ ಧರೆ ||

ನೂಲು ಕಾಯಕ, ನಿಯತಿ ಗಾಳಿ, ಮಾನಸ ವಿಕೃತಿ |

ಲೀಲೆ, ಶಿವಸಂತೋಷ - ಮರುಳ ಮುನಿಯ || (೧೧೩)

(ತೇಲಾಡುತ+ಇಹುದು)(ಕಾಲ+ಅದಕೆ+ಆಕಾಶ)

ಗಾಳಿಪಟದಂತೆ ಜಗತ್ತು ಹಾರಾಡುತ್ತಾ ಇದೆ. ಆಕಾಶವೇ ಅದಕ್ಕೆ ಸಮಯ. ನೋಡುತ್ತಿರುವ (ನೋಳ್ಪ) ಬುದ್ಧಿಶಕ್ತಿಯೇ ಭೂಮಿ (ಧರೆ). ಆ ಗಾಳಿಪಟವನ್ನು ಹಿಡಿದಿರುವ ದಾರವೇ ದುಡಿಮೆ (ಕಾಯಕ). ಪ್ರಕೃತಿಯಲ್ಲಿರುವ ಗಾಳಿಯೇ ವಿಧಿ, ದೈವ, ನಿಯಮ ಮತ್ತು ಅದೃಷ್ಟ. ಏಕೆಂದರೆ ಗಾಳಿ ಹೊಡೆದುಕೊಂಡ ಕಡೆಯೇ ಗಾಳಿಪಟ ಹೋಗಬೇಕು. ಅದು ಒಂದು ಕಟ್ಟುಪಾಡಿಗೆ ಒಳಪಟ್ಟದ್ದು. ಮನುಷ್ಯನ ಮನಸ್ಸು ಚಂಚಲವಾಗಿದ್ದು ಇದನ್ನು ಬದಲಾಯಿಸುತ್ತದೆ. ಇವೆಲ್ಲವೂ ಪರಮಾತ್ಮನ ಆನಂದಕ್ಕಾಗಿ ನಡೆಯುವ ಗಾಳಿಪಟದಾಟವಾಗಿದೆ.