ಮರುಳ ಮುನಿಯನ ಮನಸು ಸರಳ ಬಾಳ್ವೆಯ ಕನಸು |
ಸರಸ ಋತ ಸೌಜನ್ಯ ಶಾಂತಿಗಳ ಸೊಗಸು ||ಕೆರೆಯಿನೆದ್ದಲೆಯೆರಚಿ ತಣಿವು ತುಂತುರನಿನಿತು |
ಮರಳಿ ತೆರೆ ಸೇರ‍್ವುದಲ - ಮರುಳ ಮುನಿಯ || (೮)
(ಕೆರೆಯಿನ್+ಎದ್ದ+ಅಲೆ+ಎರಚಿ)(ತುಂತುರಂ+ಇನಿತು)(ಸೇರ‍್ವುದು+ಅಲ)
ಮರುಳ ಮುನಿಯನ ಮನಸ್ಸು ಕಾಣಬಯಸಿದ್ದು ಸರಳವಾಗಿ ಜೀವನವನ್ನು ನಡೆಸುವ ಕನಸು. ಅದು ವಿನೋದ, ಸತ್ಯ, ವಿನಯ, ಶಾಂತಿ ಮತ್ತು ನೆಮ್ಮದಿಯಿಂದ ಕೂಡಿರುವ ಸುಖ ಮತ್ತು ಚೆಲುವುಗಳ ಕನಸು. ಕೆರೆಯಿಂದ ಎದ್ದ ಒಂದು ಅಲೆಯು ಸ್ವಲ್ಪ ತುಂತುರು ಹನಿಗಳನ್ನು ತನ್ನ ಹತ್ತಿರವಿರುವವರ ಮೇಲೆ ಚುಮುಕಿಸಿ, ತಂಪನ್ನು ನೀಡಿ ಪುನಃ ಕೆರೆಯನ್ನು ಸೇರುವಂತೆ, ತಾನು ಈ ಜಗತ್ತಿನಲ್ಲಿ ತನ್ನ ಸಂಪರ್ಕಕ್ಕೆ ಬಂದ ಜನಗಳಿಗೆ ತಂಪನ್ನು ನೀಡಿ, ಪುನಃ ಭಗವಂತನಲ್ಲಿ ಲೀನವಾಗುವ ಕನಸು.
No comments:
Post a Comment