ಕಾಚದೃಗ್ಯಂತ್ರದಿಂ ಗಣಿತ ಸಂಕೇತದಿಂ (199)

ಕಾಚದೃಗ್ಯಂತ್ರದಿಂ ಗಣಿತ ಸಂಕೇತದಿಂ |
ಲೋಚನಗ್ರಾಹ್ಯ ಪ್ರಪಂಚದುಪಮಿತಿಯಿಂ ||
ವಾಚಾಮಗೋಚರವನರಸುವಂ ನಭಪಟವ |
ಸೂಚಿಯಿಂ ಹೊಲಿವವನು - ಮರುಳ ಮುನಿಯ || (೧೯೯)

(ಪ್ರಪಂಚದ+ಉಪಮಿತಿಯಿಂ)(ವಾಚಾಮಗೋಚರವನ್+ಅರಸುವಂ)

ಗಾಜಿನ ಸೂಕ್ಷ್ಮದರ್ಶಕ ಯಂತ್ರದಿಂದ(ಕಾಚದೃಗ್ಯಂತ್ರದಿಂ), ಗಣಿತದ ಸೂತ್ರಗಳಿಂದ ಮತ್ತು ಕಣ್ಣಿಗೆ ನಿಲುಕುವ (ಲೋಚನಗ್ರಾಹ್ಯ) ಪ್ರಪಂಚದ ಹೋಲಿಕೆಗಳಿಂದ (ಉಪಮಿತಿಯಿಂ) ಮಾತಿಗೆ ನಿಲುಕದ (ವಾಚಾಮಗೋಚರವನ್) ಪ್ರಪಂಚವನ್ನು ಹುಡುಕುವುದು, ಆಕಾಶವೆಂಬ ವಸ್ತ್ರವನ್ನು (ನಭಪಟ) ಸೂಜಿ(ಸೂಚಿ)ಯಿಂದ ಹೊಲಿಯುವುದಕ್ಕೆ ಪ್ರಯತ್ನಿಸಿದಂತಾಗುತ್ತದೆ.