ಆಕಾರವೆನೆ ರೂಪನಿಯತಿಯದು ಗಾತ್ರಮಿತಿ (244)

ಆಕಾರವೆನೆ ರೂಪನಿಯತಿಯದು ಗಾತ್ರಮಿತಿ |
ರೇಖೆಯೊಳು ಮಿತಬಡಿಸುವೆಯ ಅಪರಿಮಿತವ ? ||
ಬೇಕು ಮಿತಮತಿಯ ಹಿಡಿತಕೆ ಹಿರಿಯ ಗುರುತೊಂದು |
ಸಾಕಾರಮಂತುಚಿತ - ಮರುಳ ಮುನಿಯ || (೨೪೪)

(ಗುರುತು+ಒಂದು)(ಸಾಕಾರಮಂತು+ಉಚಿತ)

ಆಕಾರವೆನ್ನುವುದು ರೂಪದ ನಿಯಮ. ಆದರೆ ದೇಹವು ಒಂದು ಪರಿಮಿತಿಯಲ್ಲಿರುತ್ತದೆ. ಎಲ್ಲೆಯಿರದಿರುವ ಸತ್ತ್ವವನ್ನು ಒಂದೇ ಗೆರೆಯಲ್ಲಿ ಹಿಡಿಯಬಯಸುವೆಯೇನು? ಮಿತವಾದ ಬುದ್ಧಿಶಕ್ತಿಯ ಹಿಡಿತಕ್ಕೆ ಒಂದು ದೊಡ್ಡ ಚಿಹ್ನೆ ಬೇಕು. ಅದಕ್ಕೆ ಸರಿಯಾಗಿರುವುದು ಆಕಾರ ಮತ್ತು ರೂಪವಿರುವ ವಸ್ತು.

(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

An image is a fixed form of right proportions
Can you limit the limitless within lines?
However a proper symbol is needed for the limited mind to grasp
Appropriate therefore is a concrete form – Marula Muniya

(Translation from "Thus Sang Marula Muniya" by Sri. Narasimha Bhat)