ಅನಿತಿನಿತು ಶಾಸ್ತ್ರಂಗಳನಿತಿನಿತು ನಿಜಯುಕ್ತಿ (529)

ಅನಿತಿನಿತು ಶಾಸ್ತ್ರಂಗಳನಿತಿನಿತು ನಿಜಯುಕ್ತಿ |
ಇನ ಶಶಿ ಪ್ರಭೆಯಿನಿತು ನೆಲದ ಹಬೆಯಿನಿತು ||
ದಿನದಿನದ ಗತಿಯಿನಿತನಂತದ ಸ್ಮೃತಿಯಿನಿತು |
ಅನುಗೂಡೆ ಬೆಳಕಿಳೆಗೆ - ಮರುಳ ಮುನಿಯ || (೫೨೯)

(ಅನಿತು+ಇನಿತು)(ಶಾಸ್ತ್ರಂಗಳ+ಅನಿತು+ಇನಿತು)(ಗತಿಯಿನಿತು+ಅನಂತದ)(ಬೆಳಕು+ಇಳೆಗೆ)

ಸ್ವಲ್ಪ ಮಟ್ಟಿಗೆ ಗ್ರಂಥಗಳಿಂದ ಸಂಪಾದಿಸಿದ ಜ್ಞಾನ, ಸ್ವಲ್ಪಮಟ್ಟಿಗೆ ತನ್ನ ಸ್ವಂತ ಸಮಯೋಚಿತ ಜ್ಞಾನ, ಸ್ವಲ್ಪಮಟ್ಟಿಗೆ ಸೂರ್ಯ(ಇನ) ಮತ್ತು ಚಂದ್ರ(ಶಶಿ)ರುಗಳು ನೀಡಿದ ಬೆಳಕು ಮತ್ತು ಕಾಂತಿ, ಸ್ವಲ್ಪಮಟ್ಟಿಗೆ ಭೂಮಿಯ ಹಬೆ, ಪ್ರತಿನಿತ್ಯದ ಚಲನೆ ಮತ್ತು ಮುಂದುವರಿಯುವಿಕೆ, ಅನಂತವಾಗಿರುವ ಧರ್ಮ ಮತ್ತು ವೇದಗ್ರಂಥಗಳ ನೆನಪು, ಇವುಗಳೆಲ್ಲವೂ ಹೊಂದಿಕೊಂಡು ಸೇರಿದರೆ ಭೂಮಿ(ಇಳೆ)ಗೆ ಬೆಳಕು ದೊರಕುತ್ತದೆ.
(ಕೃಪೆ: ಶ್ರೀ. ಶ್ರೀಕಾಂತ್‍ರವರ "ಮರುಳ ಮುನಿಯನ ಕಗ್ಗ - ತಾತ್ಪರ್ಯ")

In some measure from scriptures, in some measure from one’s own wisdom
With some light from the sun and moon, some steam from the earth
Some measure of daily forward movement and some remembrance of the Infinite
All these mingle together and light up the world – Marula Muniya
(Translation from "Thus Sang Marula Muniya" by Sri. Narasimha Bhat)